Meghalaya U-19 Boys Inter District Cricket: Jop ka West Jaintia Hills District CA, la pynsangeh ïa ka jingïakhun ha Salpara

Shillong, Nailur 21: Ka West Jaintia Hills District Cricket Association ka la ïoh ban khur shalade ïa ka namjop da shi wicket pyrshah ïa ka East Khasi Hills Cricket Association na ka Zone 1 jong ka Group B jong ka lympung Meghalaya Cricket Association’s U-19 Boys Inter District Cricket Tournament kaba la long hynne ka Sngi Palei.
Ha kawei pat ka jingïalehkai, hapdeng ka Tura DCA bad ka North Garo Hills DCA na ka Zone 2, ha Salpara, Mendipathar la hap ban pynsangeh, khlem da ïoh ban sdang.
Haba phai sha ka jingïakhun kaba la pynlong ha Umbuda, Nongpoh, ïa ka jingïakhun la pynduna sha ka 25 over. Ka EKH ka la jop ïa ka jingkynting (toss) bad ka la jied ban tied nyngkong da ka jingthmu ban buh ïa ka thong kaba heh. Hynrei, ka la shem jingeh hadien ba ka la shah pynhap lai ngut ki rangtied ba hakhmat bad kamai tang 30 ron. Hadien kane, u Nangsan Kynter (14) ryngkat bad u Daulabiang Shangpliang (35) ki la lah ban kyntiew ïa ka ron na bynta ka EKH sha ka 100 ha ryngkat bad ar wicket kiba la shah pynhap hapdeng kane ka por.
Hynrei ka la ïakynduh mawsiang biang hadien ba duh noh haduh lai wicket bad kamai tang 5 ron ha kaba ka EKH ka la kynjoh sha ka 107/8. Na ka liang jong u Jentizen Marpna, u la ïoh ban ïarap 16 ron khlem shah pynhap (not out) na ki 11 bol, kaba la ïarap ïa ka kynhun ban buh ïa ka thong da 132 shuwa ban shah pynhap baroh. Napdeng ki rangkawangbol, u Namewanki Pakyntein u la ïoh ban khur 3/20 katba u Byforcestar Dhar u la khur 2/25.
Haba beh ïa ka thong, ka West Jaintia Hills ka la mad ïa kajuh ka jingeh da kaba shah pynhap 3 wicket bad tang 30 ron shuwa ba u Chwamiki Ryngkhlem (18) bad u Namewanki (19) kin sa ïoh ban kyntiew 47-ron kaba la pynskhem ïa ka kynhun. Na ka liang jong ka EKH ka la ïakhun tyngeh da kaba khur wicket shuwa ba u Marconi Phawa un sa wan ban ïarap ïa ka kynhun ban khyrwit 33 ron na ki 30 bol (2x4s, 3x6s), kaba long ka jingïarap na bynta ka WJH ban kynjoh sha ka 100.
Hynrei watla kata ruh, u Marconi u khlem shym la lah ban pynkut ha kaba u la long player ba 9 ban shah pynhap, ha ka por ba ka WJH ka la kynjoh sha ka 116, bad ka donkam sa 17 ron ban jop naki 3.2 over.
Wat hapdeng kane ka jingbankhia, u Riata Challam u la lah ban khyrwit haduh ar tylli ki four (14 ron naki 22 bol), katba u Stellify N Sten u la ïoh ban kamai 2 ron naki 4 bol, kynthup bad ka ron ba ki la ïoh na ka bol ba khadduh, ban ïarap ïa ka kynhun ban khur ïa ka namjop da shi wicket.
Napdeng ki rangkawangbol, u Damechwa Khongsngi (3/11) u long u ba seisoh na bynta ka EKH, katba u Despenly Syiemlieh (2/32) bad u Daulabiang (2/34) ki la ïoh ban khur mar 2 wicket.
Mynta ka sngi, ka Shillong Cricket Association A pyrshah ïa ka Ri-Bhoi DCA, katba ka South Garo Hills DCA pyrshah ïa ka North Garo Hills DCA.