30 tarik yn sdang ïa ka jingïakop mareh, palat 3 hajar ki ban wan ïashimbynta

Shillong, Nailur 21: Ka lympung ïakop mareh thong kaba la tip da ka 2nd Sohra International Half Marathon 2023 ba la pynïaid da ka Meghalaya State Olympic Association (MSOA) ha ryngkat ka jingïatreilang bad ka tnat ba dei khmih ïa ka Sport jong ka sorkar jylla, mynta u snem ka la sakhi ba ki la don palat hajar ki nongïashimbynta kiba la pynrung kyrteng ïalade ha kane ka jingïakop mareh thong ka ban long ha ka 30 tarik Nailur, 2023 kaba tam ar shah ha nujor ïa u snem ba ladep.
Haba ai jingpynshai hynne ka Sngi Palei ha ka jingdonryngkat lang u Bah John. F. Kharshiïing (Working President jong ka MSOA) bad u Bah Finely Pariat (Organising Secretary MSOA). Na ka liang jong u Bah John. F. Kharshiïing haba ai jingkren sha ki lad pathai khubor u la pynpaw ba ka thong jong ka MSOA da kaba pynlong ïa kane ka tamasa ïakop mareh ka long shi bynta ban khring ïa ka kam jngohkai (Tourism) sha kane ka thaiñ.
Ha kane ka kynti ki nongïashimbynta kiba la dep ban register ki long haduh 3975. Ha ka thup Open Meghalayan Men (21k) 340 ngut, ha ka Women ki don 55 ngut, Run for Fun (5k) 1030 ngut, Open Men (10k) 573 ngut katba ha ka Women ki don 118 ngut, 45-55 men (5k) 47 ngut, kynthei 23. Elite shynrang (21k) 84 ngut, katba ka kynthei ki don 19 ngut, Above 55 yrs men (10k) 39 ngut katba kynthei ki don 19 ngut. Ki nongïashimbynta bym shah kynthup ha ka run for dun ki don haduh 1202 ngut napoh ka jylla bad 115 ngut kiba na shabar.
La pyntip ïa ka jingsam ïa ki Tshirt sha kito ba shimbynta ha ka Run for Fun napoh Shillong kan long ha ka 26-27 tarik na Ophis jong ka MSOA , por 12 baje mynsngi. Katba ïa ki Chest no bad ki Tshirt sha kiwei pat kan long ha ka 28-29 tarik Nailur naduh ka por 10 haduh 4 baje janmiet ha Shillong sports stadium. Ki nongïashimbynta na Shillong kin hap ban poi ha ka por 5 baje mynstep ha ka 30 tarik ha State library shuwa ban mih ka kali. Katba ïa ki nongshimbynta kiba na Sohra, ka jingsam ïa ki tshirt ha ka 27 tarik Nailur ha ka por 12 baje mynsngi, ka kali kan mih na Thanad sohra sha Laitsohpliah ha ka por 5 baje mynstep. Kin don ruh hynriew ngut ki nongïakop mareh napoh Kenya ki ban wan ïashimbynta ha kane ka lympung.