Markhmat na u myntri Aviation kren u Conrad halor ka Baljek Airport, yn treikam noh ha u Nailur 2027

Shillong, Nailar 26 : U Myntri Rangbah ka Jylla, Conrad K Sangma ha ka sngi Balang la ong ba u la dep ban ïa kren hi markhmat bad u Myntri ka tnad Civil Aviation jong ka sorkar pdeng na ka bynta ban pyntreikam noh ïa ka Baljek Airport kaba don ha Tura.
Haba jubab lang halor ka jingkylli ba wanrah da ka MLA na Ampati, Miani D Shira na ka liang u Myntri Rangbah u la ong ba ha ka jingïakren la buh ba katei ka kad liengsuin kan sdang treikam noh naduh u Nailur jong u snem ban wan.
Nangta u la ïathuh ba ki khmih lynti ba hadein ba la dep soi ïa ka MoU bad ka jingaiti sha ka AAI ha u Nailur, ki don por pat sa kumba 8-9 bnai ei ei ban maramot biang ïa ki jingtei kiba la rim bad ruh ban pynbha ïa ka runway.
Ha kajuh ka por u Myntri Rangbah u la ïathuh ba ka kam ka la ïaid ryngkat ryngkat ban ïoh ïa ka jingmynjur ban pynher ïa ka liengsuin ba ngiam 19 ngut ki nongshong ha ka lynti hapdeng ka Kolkata bad Shillong.
“Ngi dang bishar bniah ïa kine ki lynti bad ngin bteng ban buddien ban pyntikna ba kin urlong,” u la ong da kaba pynpaw ïa ka jingkyrmen ba hapoh ki khyndai bad la kumno kumno ha u Nailur jong u snem ban wan kin sa lah ban sdang noh ïa ka kam.
Shuh shuh u la ong ba ka Baljek Airport kadei kaei kaei kaba u (L) PA Sangma u la sdang bad kumta ka dei kaba kongsan bha ïa u bad ïa baroh hi. “Ki don bun bha ki jingeh hynrei ngi trei shitom,” u la ong.
Da kaba ïathuh pat ïa ka jingïakynduh bad u Myntri Civil Aviation, u Myntri Rangbah u la ong ba u Myntri u dei u paralok ba jan bha bad u naduh ka por ba ki dang don lang ha Parliament. “Nga la ong ïa u ba kane ka dei ka jingai sngewbha kaba u lah ban ai ïanga, kata ban pyntreikamnoh ïa ka Baljek Airport.”
Ha kajuh ka por u la ïathuh ba ka kam ha Shillong Airport ruh ka la ïaid shaid shaid bad ba ka sorkar jylla ka don ha ka kam ban pyntikna ba kin lah ban pyndep ha ka por ba la buh.
Shwa kane, u Symbud Myntri Rangbah ba peit ïa ka tnad Transport, Bah Sniawbhalang Dhar u la ïathuh ba ka AAI ka dang pynkhreh ïa ka Master Plan ba thymmai na ka bynta ban pynheh ïa ka Baljek Airport khnang ba ki liengsuin ATR ATR-72/Q-400 bad A320 kin lah ban wan.