ïakren u CM ïa ki myntri sorkar pdeng kyrpad ban pynheh ïa ka EAP bad kyntiew kyrdan ïa ka NEIGRIHMS
Shillong, Nailar 26: U Myntri Rangbah ka Jylla u Conrad K Sangma ula ong ba ula pan ïa ka jingkyrshan na ka Sorkar Pdeng ban kyntiew ïa ka bhah jong ka Jylla Meghalaya ha kaba ïadei bad ki Externally Aided Projects (EAP), na ka bynta ka National Games bad na ka bynta ki kam ka NEIGRIHMS ha ka jingleit jongu dang shen sha New Delhi.
Haba ïakren hadien ba la wai ka jingïalang jong ka kynhun myntri hynne ka Sngi Balang, u Sangma ula ong ba ula ïakynduh ïa u Myntri ka Sorkar Pdeng uba khmih ïa ka DoNER u Jyotiraditya Scindia bad pynsngew halor kitei ki artylli ki mat.
“Ha kaba ïadei bad ki externally aided projects, nga lah pan ïa ka jingkyrshan bad ka jingïatreilang bad ka Finance Ministry ban pynkiew ïa ka bhah na ka bynta ki jylla ka thaiñ shatei lammihngi ka ri. Ka Meghalaya ka dei kawei na ki jylla kaba la lah ban pyntreikam bha bad 90 percent na ka ram ka dei kaba la siew pyndep da ka Sorkar India. Ka bhah ka jong ngi kala ïaineh beit 5,000 Klur tyngka naduh ka por jong ka Finance Commission kaba lah dep. Ngi lah kyrpad 15,000 Klur tyngka bad kyrpad ba dei ban kyntiew ruh arshah sha ka 10,000 Klur, tyngka” ula ong.
Ka mat ka baar, ka long ban kyrshan ïa ka National Games. “Ngi lah kyrpad ïa u DoNER Ministry ban kyrshan ïa ngi da ka pisa bad ïa ki jingshna ïa ki jingtei. Watla ka Meghalaya kan pynlong ïa katei ka jingïakob ïalehkai, man la ki jylla jong ka thaiñ shatei lammihngi ruh kin pynlong ïa kawei na ki jingialehkai. Na ka bynta ka mynsiem jong ka thaiñ shatei lammihngi, ka jingpan jingkyrshan na ka DoNER ka long kaba ïahap bha. Ula ong ba un sa khmih bniah bad yn sa ai ïa ki jingbatai kiba bniah hadien jong ka Dorbar” ong u Sangma.
Ha ka jingiakynduh ka jongu bad u Myntri ka Sorkar Pdeng uba khmih ia ka Koit ka Khiah u JP Nadda, u Conrad Sangma ula ong, “Nga lah ïengskhem ha ka jingkyrpad ka jong ngi ban ithuh noh ïa ka NEIGRIHMS kum ka Institute of National Importance. U Myntri ula pdiang bad ka ong, ba ka dei kaei kaei kaba ka NEIGRIHMS ka dei ban don. Nga kyrmen skhem ba kane kan sa ïaid beit”.
Ula ong, ba ula ïakren ruh ha kaba ïadei bad ka jingpynrungkam ha NEIGRIHMS. “U Myntri ula don lypa ïa ka jingtip halor katei ka mat bad ula ong ba ngi donkam ban wad ïa ki lad ki lynti ban kyntiew bad ban ïarap ia ki samla trai jylla ban kin ïoh bha ïa ka lad bad ki kabu ban ïohkam ïohjam” la bynrap u Sangma.