Rai ka Sorkar Jylla ban pynduhnoh ïa ka (Interview) na bynta ki Group C Non-Technical

Shillong, Nailar 26 : Ka Kynhun Myntri ha ka sngi Balang ka la shim ïa ka rai ban pynduh noh ia ki interview na ka bynta ki kam (post) ha ka Group C Non-Technical kiba hap ha ki District Selection Committees (DSCs), bad kane kan treikam naduh ka 01tarik Kyllalyngkot, 2027.
Haba kren bad ki lad pathai khubor, u Myntri Rangbah ka Jylla, Conrad K Sangma u la ong ba kane ka sienjam ka dei shi bynta jong ka jingpyrshang jong ka sorkar ban pynjanai ïa ka rukom thung kam thungjam ha ka jylla.
“Ka dei ka jingbteng ïa ka jingpynbha shuh shuh ïa ka rukom thungkam kaba ngi la sdang. Mynshwa, katkum ki jingai jingmut na ka UPSC bad ka Reform Commission jong ngi, ngi la pynduh noh ïa ka interview na ka bynta ki post ha ka Group-D ha ki DSC. Mynta, ngi la pynduh ruh ïa ka interview na ka bynta ki Group-C non-technical post,” u la ong haba kren bad ki lad pathai khubor hadien ka jingïalang jong ka kynhun Myntri.
U la ong ba ki technical posts hapoh ka Group-C kin dang don ïa ka interview, bad ka Personnel Department kan pynbna ïa ka thup jong ki post kiba la kheiñ kum ki technical bad non-technical.
Shuh shuh u la ong, “Ki advertisements kiba yn pynmih naduh 01 Kyllalyngkot, 2027, kin ym don shuh ïa ka interview na ka bynta ki Group-C non-technical post.”
Ka Kynhun Myntri ka la mynjur ruh ïa ka Standard Operating Procedure (SOP) na ka bynta ki DSC ban pynbeit bad pynïaid beit ïa ka rukom thung kam.
U la bynrap ba yn sa pynlong ïa ka jinghikai na ka bynta ki Deputy Commissioner bad ki ophisar kiba dei peit khnang ban pyntreikam kloi ïa ka SOP.
Hadien kata, kane ka SOP kan sa pynïar ruh sha kiwei pat ki recruitment board, kynthup ïa Medical, Rural Development bad Police.