Shillong, K’Lyngkot 03 : U Myntri Rangbah ka Jylla, Conrad K Sangma ha ka sngi Saitjaiñ u la pynlut por ha ki shnong jong ka North Garo Hills kumjuh ha East Garo Hills ban ïoh sngew markhmat ïa ka jingeh bad ki jingdonkam kiba ki paidbah nongshong shnong ki kynduh.
Ha East Garo Hills u Myntri Rangbah ryngkat u Myntri ka tnad PHE kumjuh u Jim Sangma, MLA, ki la pynlut por ban ïa kynduh ïa ki nongshong shnong jong ka Bolblong bad ki jaka ba marjan.
“Ha kane ka jingkynduh ngi la ïoh ka lad ban sngap ïa ka jingeh ba ki nongshong shnong ki kynduh bad ngi la ïa kren ruh ïa ki lad ki lynti kumno ban kyrshan ïa ki kynthup ïa ka roi ka pa ha ka thain,” ong u Myntri Rangbah ha ka rynsan social media.
Ha North Garo Hills pat u Myntri Rangbah u la pynlut por ban kynduh ïa ki nong shong shnong jong ka Memilam bad ki jaka ba marjan kiba hap ha ka Adokgre C&RD Block.
Na ka liang u Myntri Rangbah kumba leh ha East Garo Hills u la pynlut por ban sngap ïa ka jingpynsngew na ki nongshong shnong bad hadien kane pat ka la don sa ka jingïasyllok bad ki na ka bynta ka jingkyntiew ïa ka roi ka pa ha ka thain baroh kawei.
