Mar ïa pynkylla Sirdar, pulom ka lehñiam Shad Sajer ka Elaka Nongpoh, rai ki 6 Raid ban pynsangeh
Nongpoh, Lber 21: Ka Shad Sajer Committee jong ka Elaka Nongpoh Sirdarship mynta ka sngi kala shim syndon ïaka rai ban pynsangeh noh ïaka lehñiam Shad Sajer kaba la rai ban pynlong haka 23 tarik mynta u bnai ha u Lum Wortoh hadien ba naka liang ka District Council kala thung biang ïa u Bah Wanphrang Syiem Nongshai kum u Sirdar ka Elaka Nongpoh Sirdarship bad pynkut noh ïa ka jingtreikam u Bah Pillarstone Syiem Nongshai kum u Acting Sirdar.
Na ka liangka Sajer Committee ryngkat ki Lyngdoh na 6 tylli ki Raid ba kynthup ïaka Raid Nongkharai, Raid Nongpoh, Raid Nonglyngdoh, Raid Nongkhrah, Raid Sohkhwai bad Raid Nongkyrla kila lum ruh da ka jingïalang bad shim ruh ka rai ba kim kwah shuh ban pynlong ïa katei ka Shad Sajer namar ki kynrum kynram ha kaba ïadei bad ka kam Sordar hadien ba ka District Council kala pynskhem biang ïa u Bah Wanphrang Syiem Nongshai u ba la shah sospon shipor naka jingdon ka jingujor pyrshah ïa u halor ki kam synshar khaddar bad weng noh ïa u Bah Pillar Stone Syiem Nongshai naka kam Acting Sordar.
Kum ban shu kdew hangne ba naka liang ka Sajer Committee kala dep ruh ban pynkhreh pynkhrum bad ban khot sngewbha ruh ïaki briew bad ki paidbah na kylleng ka bri u hynñiewtrep ban wan sakhi ïaka jingriewspah ka kolshor bad riti ka dustur lyngba ka Lehñiam Shad Sajer kaba dei ka jinglehñiam ba shisien shisnem jong ki khun ki hajar ban pan ka kyrkhu kyrdoh na u Blei nongbuh nongthaw hadien ba u la theh shibun ki jingkyrkhu ha kine ki snem bala leit noh.
Haba kren sha ki lad pathai khubor naka liang u Bah Luistar Lyngdoh Chairman ka Sajer Committee u la ong ba kum ka Committee lem bad ki 6 Raid kila rai ban pynsangeh noh mynta u snem ïaka lehñiam Shad Sajer kaba la rai ban pynlong haka 23 tarik mynta u bnai namar ka jingrai jong ka District Council ban thung biang ïa u Bah Wanphrang Syiem Nongshai kum u Sordar haka jaka jong u Bah Pillarstone Syiem Nongshai ba kum ki 6 Raid ki pynpaw ka jingpyrshah halor katei ka rai ka District Council.
U la ong ruh ba naka liang ka Sajer Committee ka pan map naki khun ki hajar ki Raid bapher bapher ka Elaka Nongpoh Sirdarship bad kumjuh ruh ïaki paidbah ka bri u hynñiewtrep, ki nongshah khot sngewbha kiba la thmu ban wan sakhi ïa katei ka jinglehñiam ba ïa mynta ki hap ban pynsangeh noh na kitei ki daw ba ka Committee kala pynpaw.