3 lak tam shah thok ki longkmie ban pynïoh tyndong lyer shet ha shnong Sohmynting
Jowai, Lber 21: Ka jingshah thok shah sukor jong ki paidbah ka la nangjur katba nang mih ki sngi, la sakhi mynta ka sngi ki longkmie na ka shnong Sohmynting West Jaiñtia Hills District kila leit mih sha Jowai Police Station ban ujor ejahar pyrshah ïa uwei u briew uba la pan pisa ban pynïoh ïa ka tyndong lyer bad ka Stove shet jingshet.
Ïa utei u briew ba leh thok la tip kyrteng kum u Ialam Makri uba na ka shnong Umsning Nongthymmai, Ri-Bhoi District katkum ka jingpynpaw kitei ki longkmie, shuh shuh la ïathuh ba utei u briew ula kular pynïoh tyndong lyer shet (Gas) ïa ki 93 ngut ki longkmie ka shnong da kaba pan pisa haduh 2500/-, 4000/- lane 6 hajar kawei ka longkmie.
Ha kajuh ka por utei u Ialam Makri u la pynithuh ïalade kum u nongtrei Agency ban pynïoh Gas ïa ki naka M/s Ri Pnar bad na M/s Rymbai. Da kaba ula pyndonkam ruh da ka seal kaba don ki jingthoh INDANE CYLINDER GAS STORE bad ka INDANE GAS CYLINDER ban ai shap ha ka Cash Memo ban lum pisa na ki nongshong shnong.
La ïathuh da kitei ki longkmie baroh kiba la dep siew pisa sha u kaba la kot sha ka 3 lak tyngka tam, ïa kane ka kam ula leh naduh u bnai Jymmang, 2023 hynrei ula dep ban sam tyndong lyer shet (Gas) tang kumba 20 ngut ki longkmie hynrei haduh mynta utei u briew ula jah khlem da wam mih shuh shapoh ka shnong.
Ka jingïoh lad jong utei u briew ban thok bad leh shukor ïa ki longkmie ka shnong ka long da kaba ula leit mih shwa sha ki bor shnong ba kin shah ïa u ban leh ïa kane ka kam hapoh ka shnong, ka shnong da ka jingthmu ïa ka kam ba bha kala shah ïa u ban leh ïa katei ka kam, hynrei ka la long pat ka kam thoh kam shukor jong u.
Halor kane, kitei ki longkmie u la leit ban buh da ka ejahar ha Jowai Police Station ba dawa pynshitom shi syndon ïa utei u Ialam Makri da kaba kem bad leh ïa kaba donkam bad ba un pynphai noh ïa ka pisa bala dep shim, ha kajuh ka por ki la kyntu ïa kiwei de ki longkmie jong kiwei de ki shnong ba kim dei ban shah pynbeit ha kum une u briew, katkum ka jingïoh jingtip kila ong kum kane ka kam thok ula leh sha kiwei de ki shnong.