Jynrat ka tnat Elekshon ïa ki jingthoh ba ïaroh ka Sorkar Pdeng bad Sorkar Jylla

Shillong, Lber, 21: Da kaba bud ïa ki kyndon jong ka Election Commission of India ba ïadei bad ka jingpyntreikam ïa ka Model Code of Conduct (MCC) hadien ba la pynbna ïa ka elekshon Lok Sabha 2024, ka tnat Elekshon jong ka Jylla hapoh 72 kynta ka la phah tar bad phah jynrat lut ïa baroh ki jingthoh kiba ïaroh ïa ka Sorkar Pdeng bad ka Sorkar Jylla.
Katkum u kyrwoh ba la phah da ka tnat Elekshon ka Sorkar Jylla, ka la pyntip ba ïa ki hukum jingmana ladep pynmih da ki bor synshar distrik, ka jingthaw ïa ki Flying Squad ha baroh ki Constituency, la buh ruh ïa ki Expenditure Monitoring Agency, la pynsngewthuh bniah ïa ki tnat treikam ka Sorkar ïa baroh ki kyndon jong ka Model Code of Conduct, la weng ruh ïa ki dur jong ki riewsaiñpyrthei na ki Website ka Sorkar bad la weng ruh ïa ki jingthoh ba pynsniewdur na ki jaka sorkar, na ki jaka paidbah bad na ki jaka jong ki riewshimet hapoh kine ki 72 kynta ba la leit noh naduh ba la pyntreikam ïa ka Model Code of Conduct.
Ha kaba ïadei bad kine ki jingtreikam ba la kdew hangne, ki bor synshar distrik hapoh ka jylla ki la weng 109 tylli ki poster na ki jaka sorkar, 248 tylli na ki jaka paidbah. Ki banner ba la weng na ki jaka sorkar ki long 228 tylli, na ki jaka paidbah 440 tylli.
Ki Hoarding ba la weng na ki jaka sorkar ki long 43 tylli bad 58 tylli na ki jaka paidbah.
Ki jingthoh ba pynsniewdur ba la weng na ki jaka sorkar hapoh 24 kynta ki long 323 tylli, na ki jaka paidbah ba la weng hapoh 48 kynta ki long 599 tylli bad na ki jaka shimet ba la weng hapoh 72 kynta ki long 253 tylli.