Jowai, Lber 21: Ka tnad treikam jong ka District Commerce and Industries Centre Jowai, ha kane ka 20 tarik u Lber, 2024 kala pynkup burom ïa ki 25 ngut ki ba lah pyndep ïa ka jingshah hikai ban shna ïa ki jingshna bapher bapher kum ki Jewellery products bad ki Utility products, da kaba pyndonkam da ki siej.
Kane ka jingai jinghikai ka la ïaid 25 sngi lynter ha ka shnong Sohkha Mission Village West Jaiñtia Hills District bad ïa ka jinghikai lah wan ai da ki Master Craftsmen jong ka Neera Foundation na ka bynta kitei ki 25 ngut kiba lah pyndep ïa ka jingshah hikai bad la pynkup burom ïa ki da u kongsan u bah M.L Wanshnong Joint Director, Directorate of Commerce and Industries, ha ryngkat ka jingdon u bah S Majaw Retired General Manager, kong Neera Sarmah, Director, Neera Foundation, kong S.E Kharpran, Functional Manager DCIC Jowai, bah S. Pale, Industrial Promotion Officer DCIC Jowai, ma P. Suchen, Rangbah Shnong, ma M. Manner, Secretary Shnong lem bad kiwei.
U kongsan, ha ka jingkren jong u, u la ïaroh ïa kitei ki nongshah hikai kiba la pyndon kam ïa la ka sap lyngba ka jingshah hikai jong ki, ula kyntu ïa ki ban pyndonkam hok ïa ki jinghikai ba ki la ïoh bad ban pynjanai shuh shuh ïa ka kam bad ki jingshna jong ki.
Ha kane ka jingïalang la ïoh ruh ïa ki jingkren na u ma P. Suchen, kong Neera Sarmah bad na ka kong S. E Kharpran, kumjuh ruh na ki ar ngut ki nong shah hikai kiba la pynsngew ïa ka jingmyntoi ba ki ïoh ha kine ki 25 sngi jong ka jingshah hikai jong ki.
