Manla ka sngi dei ka sngi khuid sngi kyntang, pynphai nia u Myntri ïa ka STIEH

Shillong, Risaw 18 : U Myntri ka tnad Tourism ka sorkar jylla, Bah Paul Lyngdoh ha ka sngi Balang u la ong ba man la ka sngi kadei ka sngi khuid sngi kyntang bad kam dei satia kyrpang tang kawei ka sngi ka sngi khuid katba kiwei pat ki sngi jong ka taiew ki dei ki sngi bymkhuid.
Kane ka jingkren jong u kadei halor ka jingpyrshah jong ka kynhun Saindur Tipkur Tipkha Ehrngiew Hynniewtrep (STIEH) ban pynkut ïa ka tamasa Cherry Blossom ha ka sngi U Blei.
Lah ban pynkynmaw ruh hangne ba katei ka tamasa kan sdang ha ka jylla naduh ka 17tarik Naiwieng bad kan kut pat ha ka 19tarik utei u bnai kaba hap ha ka sngi U Blei.
“Man la ka sngi kadei ka sngi khuid bad ka sngi kyntang bad kam mut ba ki briew ki long khuid bad ngeit blei tang ha kawei ka sngi jong ka taiew katba kiwei pat ki sngi ki long ki bym khuid,” ong u Myntri haba jubab halor katei ka jingpyrshah da katei ka kynhun.
Katei ka tamasa kaba ka sorkar ka pynkhreh ban pynlong shen ha u bnai ban wan la khmih lynti ba ki nongwan kai na kylleng ki bynta jong ka pyrthei kin poi sha ka shi lak ngut ei ei. Ha kitei ki sngi ka sorkar ka la pynbna ruh ba kin don bun ki nongtem ba pawnam na shabar nalor ki nongtem nongput kiba kynsai na kane ka jylla.