Da ka Vending Scheme ban ym pynwit ïa kali, paidbah ne pynkhapngiah pynbna ka Sorkar

Shillong, Risaw 18 : Ka kynhun Myntri ha ka sngi Balang ka la mynjur ïa ka Meghalaya Street Vendors (Protection of Livelihood and Regulation of Street Vending) Scheme 2023, da ka thong ban peit ïa ka bit ka biang jong ki nongdie madan bad ruh ha kajuh ka por pat ba kan ym ïa ki nongleit nongwan, ïa ki kali, ïa ka jingkhapngiah bad khamtam eh ha ka suk ka saiñ.
Haba pyntip ïa katei ka rai, u Myntri ka tnad Social Welfare ka sorkar jylla, Bah Paul Lyngdoh u la ïathuh ruh ba lyngba katei ka skim, ka sorkar kan sa sorbe ïa baroh ki nongdie madan ban lap ïa ki nongdie madan kiba la dep ïoh jingithuh bad ki nongdie madan ba shu wan die kumto.
Shuh shuh u la pyntip ba ka bynta kaba nyngkong kaba kin leh ka long ba ki nongdie madan ki dei ban don ïa ka kot thep vote (EPIC) ba la ai da ka tnad Election jong ka Ri, nangta ruh ba kin don ïa ki certificate ban pynshisha ba ki la dei ki nongshong shnong ka Meghalaya na ka bynta lai snem.
“Ki nongdie madan kidei ban long kiba la dep shong die madan ha kato ka jaka kaba duna eh ruh na bynta 6 bnai bad ba kin don ruh ïa ki trading licence kiba biang ha ki jaka ba ha shabar jong ka Shillong Municipal Board,” u la ong.
La ïathuh ruh ba katei ka jingpyntreikam ïa katei ka rai kadei hadien ba ki la ïoh pdiang ïa ki jingai jingmut na kiba bun ki liang la ka long naduh ka District Council, KSU, Rangbah Shnong bad ruh na ka synjuk ki nongdie madan nalor kiwei kiwei.
Ha kajuh ka por u Myntri u la pyntip ruh ba ka sorkar kan sa phah sorbe ïa kito ki nongdie madan bad pynïaid shakhmat ïa ka kam katkum la buh. U ong ruh ba kane kan kynthup ruh wat ïa ka jingjied ïa ki jaka hangno ban shah shong die madan bad hangno ba yn ym shah.
“Ka sorkar kan sa shim ruh ïa ka rai ban buh da ka jaka die jingdie na ka bynta ki nongdie madan bad ka iew na ka bynta jong ki,” bynrap biang u Myntri.
Shwa kane, u Myntri u la pyntip ba ka jingrejistar kan shimpor katto katne por bad kan sa bud pat sa ka jingpeit ïa ki jaka ban buh ïa ki jaka die madan.
U Myntri u la ïai ban ruh ba ki lynti ïaid kjat da lei lei yn ym shah ba yn pynlong ïa ki kum ki jaka die madan.
“Yn sa jied ïa ki jaka die madan kaban ym ktah ïa ki kali, ïa ki paidbah ba ïaid ba ieng bad ruh kiban ym pynthut ïa ka suk ka sain lane ban ym don ka jingkhapngiah.”