Nongstoiñ, Risaw 18: Ka Hynñiewtrep Youths Council West Khasi Hills District, mynta ka sngi ka la leit ïakynduh ïa u District Forest Officer ryngkat bad ka jingthoh, ban ai hakhmat jong u ban nym ai Clearance Certificate ïa ka Karkhana M.D.Ferro Alloys kaba don ha Umjaru Rwiang West Khasi Hills District, ha kaba na ka liang u District Forest Officer u la ong ba ïa kane un phah ha ki bor kiba halor.
Ka seng ka kyntu ïa ki bor ba halor ba kim dei ban ai ïa ka Clearance. Lada ki lah ai ruh dei ban pynduh pyndam noh namar kum ka seng ka ïohi ba ha kine ki snem ba lah leit, ka jingdon ki karkhana ka long ka jingmyntoi tangïa ki katto katne bad kam wanrah ka jingmyntoi ïa ki nongshong shnong ïa ki paradoh para snam.
Kane ka karkhana ka don ruh hajan wah bad kan sah ktah ïa ka wah ïa ka jonglong ka mariang ruh bad ïa ki paidbah ruh. Dang ha kine ki bnai na ka liang ka seng ka la leit ïa kynduh ïa u Deputy Commissioner jong ka District ban dawa ban pynlong ïa ka Public Hearing, ha kaba na ka liang u DC u la ong ïa ka Seng ba un phah ha ki bor ba halor ha kaba ïa dei bad ka jingdawa ka Seng.
Ha kine ki sngi ka seng ka la ïoh ïa ka jubab na u DC ryngkat ka shithi ba wan na ka Meghalaya State Pollution Control Board, ha kaba kane ka shithi ka ong ba lada kata ka karkhana ka pynmih kumba 30,000 tonnes per annum, kata ka PTA ym donkam ban buh ïa ka Public Hearing.
Ka seng kan nym kynran dien bad kan ïai budien ïa kane ka bynta, kumjuh ruh ïa kiwei ïa kiwei ki karkhana ba don hapoh ka District, ba ki dei ban long ka jingmyntoi ïa ki paidbah ki nongshong shnong, khamtam ïa ki paradoh para snam, ong u Samla Wanteibok Lyngdoh General Secretary HYC WKHD.
