Man ba ngi rakhe lehkmen ha kano kano ka sngi, thung uwei u dieng kum ka jingkitkhlieh : AL Hek

0

Nongpoh, Jylliew 05 : U Bah AL Hek Myntri ka tnad Animal Husbandry and Veterinary haba kren haka jingïalang ban rakhe ïaka sngi pynneh mariang ha Umtrew u la ong ba lada kum ki nongshong shnong ngi kitkhlieh nalade ïaka jingjot jong ka mei mariang thung uwei u dieng man ba don kano kano ka sngi leh kmen la ka long ka sngi kha ruh namar kane kan wanrah ïaka jingkylla haka mei mariang, ym ban shu rakhe tang haka 5 tarik Jylliew.
U Bah AL Hek u la ong ruh ba kum uwei naki riew rangbah u ju sngew tynnad ban thung dieng wat shabar ka jylla namar kane ka dei ka jingkitkhlieh nalade ban pynneh pynsah ïaka mei mariang, bad kyntu ruh ïaki paidbah ba ka jingkylla jong ka suiñ bneng ka dei hi ka jingleh jong u bynriew kumta ngi donkam ban thung shibun shibun ki dieng ban pynjyrngam pat sa shisien ïaka rong bala lip noh jong ka mariang.
Ïa katei ka prokram thung dieng ha Umtrew la pynlong da ka ophis jong u Range Forest Officer, Unsning Social Forestry haka jingïatrei ryngkat bad ka St. Joseph’s Academy of Nursing, Umtrew ban rakhe kyrpang ïaka sngi jong ka Mei Mariang ne ka World Environment Day halor ka phang “Solution to beat Plastic Pollution”, da kaba pynlong ïaka jingthung dieng bad pynkhuid ïa ka mei mariang.
Ha kane ka sngi kum ka jing nohsynñiang sha Mei Mariang, naka liang ka Tnad Forest ki la pynlong ïaka jingthung ïaki tynrai dieng ha sawdong ka Shnong Umtrew bad ïa shimbynta ruh haka jing pynkhuid ruh ïaka wah Umtrew bad tam ruh ïaki plastic kiba la pynjakhlia ïaka sawdong sawkun jong katei ka shnong bad haba wai jong katei ka program naka liang ki ophisar jong ka Tnad Fishery Department ki la pynlait symbai dohkha ha ka wah Umtrew.
Ha kane ka sngi kyrpang la wanna ban ïa shim bynta lang da u Myntri ka jylla ba dei peit ïaka Animals Husbandry and Veterinary Department u bah AL Hek kum u kongsan haka jingïadon ryngkat lang u Bah Bijoy Lyngdoh, MFS, North Khasi Hill Social Forestry Division, Ri-bhoi District, Kong M Khongjliew Superintendent of Fisheries Ri-Bhoi, Kong B Rani, Principal ka St. Joseph Academy of Nursing, ki samla pule ka St. Joseph Academy of Nursing, Bah S Diengdoh Rangbah Shnong Umtrew, ki Seng Samla Shnong Umtrew, Seng Longkmie bad kiwei kiwei ki riew paidbah.

Leave A Reply

Your email address will not be published.