Lynñiar ki paidbah ba kiew dor palat pud ki mar bam ha Iewduh

Shillong/Tura, Jymmang : Ka jingkiew dor ki marbam mardih ha ki ïew ki hat la ka long naduh Iewduh haduh ki iew kiba don ha rilum Garo kum ha Tura, ka la pynlong ia ki paidbah ban lynñiar lut namar ka la long shaba palat pud.
Lada phai sha Iewduh, ka jingkiew dor ka long khamtam eh ki jhur ki jhep, ka doh, kwai tympew bad kiwei kiwei. Ia kane na ka por sha ka por ki paidbah ki ud khamtam eh halor ka jingbteng ban pynkiew dor ia ka doh la ka long naduh ka doh masi, haduh ka doh sniang bad mynta sa ka dohsyiar.
Kane kajuh ka jingkiew dor ka ktah ruh ia ki nongshong shnong ha rilum Garo haduh ba ka pynlong ia ka Garo Student Union, ban thoh mardor sha u Deputy Commissioner ka West Garo Hills, u Swapnil Tembe halor ka jingkiew dor palat pud ka doh kumjuh ka dohkha kiba die ha iew Tura. Ka seng ka la ong ruh ba katei ka dor ba la buh kam iahap ei ei bad ka dor ba la kdew da ka Tura Municipal Board.
Katkum ka jingong jong ka seng, ka doh sniang ka poi 300 haduh 400 tyngka shi kilo, ka doh masi 500 haduh 600 tyngka shi kilo, ka doh blang 700 haduh 800 tyngka shi kilo, ka doh syiar (broiler) 300 haduh 320 tyngka shi kilo katba ka dohkha pat ka poi haduh 350 tyngka shi kilo.
“Watla ngi sngewthuh ba ka don ka jingkiew dor hynrei ka jingkiew kynsan haduh kattei bad kata ruh jan man ka sngi 30 haduh 50 tyngka ka long ka bym lah long,” ong ka kyrwoh ba la phah da u Zikku Balgra N. Marak ba dei u President jong ka Garo Student Union.