Nongstoiñ, Ïaïong, 16: Ka jingpynsangeh ban pyntreikam ïa ka skhim Mahatma National Rural Employment Grantee Scheme ha kiba bun tylli ki shnong kiba hap ha ki Block Office bapher bapher jong ka West Khasi Hills ka la pynlyngngoh haduh katta katta ïa ki paitbah.
Haba phai ha ka jingdon jong katei ka skhim, ha ka jingshisha ka la long ka jingmyntoi kaba khraw ïa ki paitbah, khmatam eh ïa kito ki shnong ha ki jaka ba kham kyndong kiba ka sorkar jylla ka la iehnoh shrah ha baroh ki liang la ka long ha ki surok, ki lynti syngkieng, ki madan ïalehkai, pung tong um bad kiwei kiwei ki kam kiba ai jingmyntoi ïa ki paitbah nongshong shnong.
Ha kaba ïadei bad ka jingsangeh ban pyntreikam ïa katei ka skhim, kiba kham bun eh ki dei ki shnong kiba hap ha ka Mawthadraishan C&RD Block. U bah Charles Sohshang uwei na ki nongkitkam ba hakhmat jong ka Marngor Area Employment Committee (AEC) haba ïakren bad u nongthoh khubor, u la ong ba ka jingpynsageh ha ka ban pyntreikam ïa katei ka skhim, ka la pynlyngngoh haduh katta katta ïa ki nongshong shnong ka thaiñ.
U la ong ba ha ki snem ba katei ka skhim ka dang ïaid bha, ki paitbah kim ju kyrduh kam ha ka bylla ka sngi bad kim da donkam than ban leit wad bylla sha kiwei pat ki jaka kiba jngai, namar tang na ka jingtrei bylla hapoh shnong na ka skhim MNREGS ruh ki la pahuh pahai khamtam eh kito kiba la don la ki jong ki jong ki Job card.
U bah Sohshang u la ong ruh ba ka jingbym treikam shuh katei ka skhim ha ki shnong kiba hap hapoh Mawthadraishan Block, ka la sdang kumba katto katne bnai ha shuwa ba ka sorkar jylla ka la plie ïa ka Eastern West Khasi Hills District. Namar ba kiba bun bah ki shnong kiba hap ha ka Eastern West Khasi Hills, ha ka Election MLA ki hap ha ka Nongstoiñ constituency katba ha ka MDC pat ki hap ha ka Mawthadraishan constituency.
Nalor kata u la ong ruh ba ka jingeh kam dei tang namar ba ka sorkar ka khlem pyntreikam shuh ïa ki projek ba thymmai kiba la mang pisa na ka skhim. Hynrei wat ïa ka bai bylla kaba rim jong ki paitbah kam shym pat la siew dep haduh mynta bad ka la pynsah ram da ki phew lak tyngka sha ki nongbylla.
U la ong ruh ba ka long kaei kaei kaba lehraiñ ïa ka sorkar jylla, ba kan shu pynsangeh ïa katei ka skhim khlem da pynshai shuwa sha ki paitbah. Namar dei tang ka kam bylla shi spah sngi kaba long laitluid, hynrei lajan kawei pa kawei ka kam bylla kaba ki nongkyndong ki im ja, ka sorkar ka la khang pyrshah bad kheiñ beaiñ.
Nalor kata kiba bun bah ki shnong kiba hap ha Nongstoiñ C&RD Block bad Mawshynrut Block ruh, kim shym la ïoh shuh ïa ki projek ba thymmai kiba la mang pisa na katei ka skhim bad ka la pynlyngngoh haduh katta katta ïa ki paitbah, ha kaba ki la kyntu ïa ka sorkar ba kan pyntreikam noh shait shait ïa katei ka skhim, khnang ba ki paitbah kin ïoh ka bylla kaba biang.
