Kyrpad ki paidbah ïa ki bor ba dei peit ban pynbha noh ïa ka surok Thiep-Bamon sha Nongnah

Mawkyrwat, Ïaïong, 15: Ka long kaei kaei ka jingpynduh mynsiem na ka bynta ki paidbah jong ka dong ka thaiñ namar hadien ba la ïohi ïa ki maw, ki dieng thang la slem bah ban phah maramot noh ïa ka surok kaba dei ïaid na Thiep-Bamon sha Nongnah bad kiwei de ki bynta jong ka surok Nongnah-Ranikor ba ki dob ki bynta la sniew palat, hynrei haduh mynta ki long tang ki jingpyni ha ki paidbah nongïaid lynti ïa ka kam kin sa leh noh, hynrei em haduh mynta.
Lah ban kdew ruh ba ha kaba ïa dei bad ka jingdawa ban maramot ïa katei ka surok la ju ïai pynsngew na ka por sha ka por na ki paidbah ba ju pyndonkam ban ïaid hynrei haduh mynta ym pat don ba patiaw ei ei ruh em. Kumta ka la buh jingeh shikatdei yn tang ïa ki kali ba ju kamai hynrei wat ïa ki ba don ki kali la jong ne ki private.
Kumta halor kane ka jingsniew palat jong ka surok, ki paidbah ki la pynpaw ïa ka jingsngewkhia namar kham bunsien hi ki surok kiba sniew ki hap hapoh ka Mawkyrwat Division bad kumjuh ruh hapoh ka Ranikor Division ki la ktah shikatdei ïa ki nongleit nongwan bad ïa ki paidbah jong ka dong ka thaiñ khamtam lei lei lada pynkit ïa kiba pang ba shitom.
Shuh shuh, kumba la ïa tip paidbah ba kane ka surok ka dei ruh ka surok kaba pynïasoh ruh ïa ka Mawkyrwat kum ka pdeng jong ka South West Khasi Hills District bad ka Ranikor Civil Sub-Division. Namarkata, da ka jingsniew jong kane ka surok ka la ktah ym tang ïa ki nongleit nongwan napoh ka thaiñ Rangthong hynrei ka la ktah ïa bun tylli ki shnong jong ka Ranikor Civil Sub-Division ruh kumjuh kiba ju pyndonkam ïa kane ka surok.
Namarkata, na ka liang ki paidbah kiba ju pyndonkam ban ïaid na kane ka surok ki la buh ka jingkyrpad ïa ka ophis jong u Executive Engineer PWD (Road) Ranikor Division bad kumjuh ruh ïa nongmihkhmat jong ka thaiñ ba kin dei ban bhah noh lane ai jingbthah noh ha ki nongpyntrei ne contractor ba dei ban leh noh ïa la ka jong ka kamram khnang ba ki paidbah kin nym don hapdeng ki jingeh ha ka leit ka wan lyngba ki kali.