Ban pynjan ïa ka jingai jingshakri jong ka Sorkar Jylla ïa ki paidbah, plie u DC ïa ka Camp Office ha Nonghyllam

By Mawphor News Desk On Apr 17, 2023

Mawkyrwat, Ïaïong, 16: U Deputy Commissioner, South West Khasi Hills District, u bah T. Lyngwa, IAS ha ka sngi saitjaiñ jong ka taïew ha ryngkat ka jingïadonlang ki ophisar na ki tnad treikam bapher bapher, u la ïoh ban plie paidbah ïa ka Camp Office ha Shnong Nonghyllam, South West Khasi Hills District kaba dei ka shnad treikam ba shi sien shi taïew kata ha ka sngi ïew Nonghyllam.
Ka jingthmu ba kongsan jong kane ka camp office ka long ban pynjan ïa ki jingtreikam jong ki ophis sorkar lem bad u paidbah namar kine ki jaka ki la long kham pajih na ka District Head Quarter. Namarkata, u la buh ka jingkyrpad ïa ki paidbah ka thaiñ Nonghyllam baroh kawei ba kin shim ïa ka kabu kaba biang eh ban pynjan ïa lade bad ki ophisar sorkar lyngba ki bynta bapher bapher.
U bah T. Lyngwa, IAS, Deputy Commissioner, South West Khasi Hills District haba kren ha ki lad pathai khubor u la ong ba na ka liang ka ophis jong u Deputy Commissioner bad ka District Administration, South West Khasi Hills District ki buh ïa kane ka Camp Office hapoh ka shnong Nonghyllam ka long da ka jingthmu ban pynsuk bad pynïajan ïa ki paidbah ha kaba ïa dei bad ki kam hapoh ki ophis sorkar ha kaba ha kane ka camp yn sa buh ïa ki tnad treikam ha la ki jong ki jong ki bynta bad ki sngi bad kiba kynthup ïa ki 7 tylli ki tnad ophis treikam sorkar jong ka distrik bad kaba long ruh ban pynjan ïa ki shnong kiba don mar khap bad West Khasi Hills District lane kiba don mar khap bad ka South Garo Hills District.
U la ong ruh ba ka daw kaba pynlong ban buh ïa kane ka Camp Office ha Shnong Nonghyllam ka dei ruh namar ba ki bun ki shnong kiba don ha kane ka Ranikor Block ki hap ban ïaid da ka kali la kumba 110 ne 120 kms haduh ban poi sha Mawkyrwat bad kane ka la ktah shibun ïa ki briew nalor ba ka la jngai ka lynti ïaid, ka bai kali ruh ka la rem than bad khamtam lei lei haba ki wan kiew sha Mawkyrwat don pat ki por ba kim lah ban ïa kynduh ïa ki ophisar ne kim lah ban pyndep ïa ki kam tang ha ka shi sngi bad kane ka la ktah shibun ïa ki. Ym tang katta don ruh ki por kim lah ban ïa kynduh ruh ïa ki nongtrei sorkar ha kaba kane kan ktah shibun ïa ka por bad ïa ka pisa jong ki briew.
Narmarkata, da ka jingdon kane ka shnad treikam ne ka Camp Office kan long ka jingïarap ïa ki paidbah nongshong shnong bad ki paidbah kiba wan donkam ha ki ophis ba kim donkam shuh ban kiew haduh ha Mawkyrwat hynrei kin ïoh ban pyndep ïa ki kam tang hangne ha Nonghyllam ha kaba na ka liang ka ophis jong u Deputy Commissioner jong ka South West Khasi Hills District u la buh kyrpang ba ki ophisar kin treikam shisien ha ka shitaïew kaba dei beit tang lada dei ka sngi ïew Nonghyllam bad kin sa plie ruh 3 kynta ha ka shisngi kata naduh ka por 10 baje mynstep haduh ka por 1 baje nohphai sngi. “Ban pynbiang ïa ki jingtreikam, hapoh kane ka Camp Office la dep ban shna haduh saw tylli ki kynhun ne team ha kaba ha kawei kawei ka kynhun kin don haduh 7 tylli ki department”, ïathuh u bah T. Lyngwa, IAS.
U la ong ruh ba ha kane ka jaka treikam kin don sa ki ophisar jong ki department bapher bapher ba kin sa ïarap ïa ki paidbah kiba wan donkam bad ba kin ïoh ruh ban wan wad ki lad jingtip halor ki lad jingïarap kiba bun ne ki scheme na ka sorkar kum na ka tnad ophis Horticulture, Sericulture, Agricultural, Fisheries bad ruh ki kam na ka bynta jong ka ophis Block bad kiwei de.
Ha kaba ïadei bad ka por plie kaba lai kynta, u bah T. Lyngwa, IAS u la ong ba lada jia ba ki paidbah ki don ka jingkwah ban plie baroh shi sngi ruh kum ki ophisar kin sa ïa pyrkhat khnang ba kan long ka jingïarap na ka bynta ki paidbah bad na ka liang jong u ruh un wan shisien shibnai ha kane ka ophis khnang ban ïoh ïa kynduh ban ïoh sngew ïa ki jingdonkam jong ki paidbah, ong u bah T. Lyngwa, IAS, Deputy Commissioner, South West Khasi Hills District.
Ïa ka jingïalang ba lyngkot la pynïaid da u bah B.J. Kharshandi, MCS, SDO (C) jong ka Ranikor Civil Sub Division, ka jingkren pdiang sngewbha bha na u bah L.T. Tariang, MCS, Project Director jong ka DRDA, South West Khasi Hills District, ka jingkren na u Sordar Shnong Nonghyllam, u bah Johnpaul Hahshah bad ka jingkren ai khublei na u bah M. Diengdoh, MCS, District Planning Officer, South West Khasi Hills District.