Kyntu ka shnong Kyndongei bad Mawkapiah ïa ka sorkar ban pynbha ïa ka surok

0

Nongstoiñ, Ïaiong 16: Ka shnong Kyndongei, Mawkapiah bad Nongrim Hills, ki la dawa na ka sorkar lyngba ka tnad PWD ba dei ban maramot ne pynbha noh ïa ka surok, namar ka la pynjynjar palat ïa ki paidbah ha ka leit ka wan, khamtam ha kane ka aiom lyiur.
Katei ka surok ka dei kaba la pyntrei lyngba ka skhim MNREGS, hynrei ha ki aïom slap ka dap tang da ki thliew ki syar bad ki kali kiba ïaid ki shem jingeh haduh katta katta lait noh tang ki trok four wheel. Na ka bynta ki paidbah jong ki lai tylli ki shnong ba kynthup ïa ka Kyndongei, Mawkapiah bad Nongrimhills, kane ka surok ka dei kaba dang donkam haduh katta katta ha ka leit ka wan bad ka kit ka bah.
Lah ban kdew hangne ba kitei ki lai tylli ki shnong ki dei kiba hap ban ïaid lyngba ka shnong Nonglang. Naduh ka shnong Nonglang, ka la don ka surok kaba la siang da ka dew bilat tang ba ka poi tang harud shnong Kyndongei bad ka bynta ba ka surok ka bteng haduh ban da poi sha Mawkapiah, dei tang ki trok ki lah ban ïaid kata ruh tang lada dei ka por ba rang.
Halor katei ka jingeh u Bah Phrancis Wanniang ha ryngkat ka jingïadonlang jong u Bah Johnfisher Syiem sordar jong ka shnong Kyndongei, ki la pynpaw ïa ka jingsngewkhia halor ka jingsniew jong katei ka surok. Kitei ki rangbah ki la ïathuh ba ki la pyrshang katba lah ban maramot hi ïa katei ka surok da kaba ïa mih paidbah ban trei. Hynrei ym lah satia ban pynbha namar ka jingdon jong ki trok kit dieng kiba ïaid ha ka por slap.
Ki la ïathuh ba ki la pynlut ruh da ka pisa ban phah kit maw ban thep ha ki thliew ki syar hynrei ym lah satia ban pynbha. U Bah Sheiñborlin Khrawaniang uwei na ki riew rangbah ka shnong Mawkapiah, u la ïathuh ba ki paidbah jong ka shnong Mawkapiah bad Nongrimhills, ki dei tang ki nongrep bad ki mar rep ba kongsan ba ki pynmih ki long u synsar bad u sying. Hynrei namar ka jingbym don ïa ka surok kaba biang ki paidbah ki shem jingeh haduh katta katta ban pynpoi ïa ki mar rep sha ki ïew ki hat.
Kitei ki rangbah ki la kyrpad jur ïa ka sorkar ba kan phai khmat lem ban phah shna da ka surok kaba kham bha ban pynpoi sha kitei ki shnong, khnang ba ki paidbah nongrep bad ki nongleit nongwan kin lait na ka jingeh.

Leave A Reply

Your email address will not be published.