Lyngba ka VBSY la pynlong ïa ka jingpynshai paitbah ïa ki skhim sorkar na ka bynta ki nongshong shnong

Nongstoiñ, Nohprah 15 : Na ka bynta ban pynshai sha ki paitbah nongshong shnong ïa ki skhim ba bun jait ba ka sorkar pdeng ka la mang kyrpang na ka bynta ki paitbah nongshong shong ka ophis u Deputy Commssionert ka West Khasi hills district mynta ka sngi thohdieng ka 15 tarik Nohprah ka la pynlong ïa ka programe ba kyrpang kaba la tip kum ka Viksit Bharat Sankalp Yatra ha kaba baroh ki tnad trei kam jong ka sorkar ki ïadon bynta lang.
Ïa katei ka programe la pynlong ha Market Complex ha khmat ïew Nongstoiñ ha kaba baroh ki nongïoh bynta na ki skhim sorkar kioba ka sorkar ka la pyntrei kam lyngba ki Block Ophis, ka tnad ka koit ka khiah, ka tnad ba peit ïa ka bording, ka rep ka riang, ka pule puthi , ka tnad sam umbam um dih ki Bank bad kiwei kiwei.
Ha shuwa ban sdang ïa ka jingpynshai paitbah la pyni ïa ka jingpyntrei kam ïa baroh ki skhim lyngba ki dur khih.Hadien ka jingpyni ïa kitei ki dur khih la sdang ïa ka jingïalang pynshai paitbah ha kaba la pynïaid da u bah F. Marweiñ bad la ïoh ïa ka jingpynshai lyngkot ïa ka jingthmu jong katei ka prokram da u bah T.Diengan Block Development Officer ka Nongstoiñ C&RD Block.
Ha kajuh ka por la ïoh ïa ka jingkren bad ka jingpynshai na ki ophisar jong ki tnad trei kam jong ka sorkar ïa ki skhim kiba ka sorkar ka la mang na ka bynta jong ki paitbah nongshong shnong.
Ha katei ka sngi ka la don ruh ka jingeksamin bad sam dawai ei sha kiba pang ba shitom , ka jingpynrung kyrteng ïa kito ki bym pat don ïa ki MHIS card, Adhaar card, ka jing ai free gas connection bad bun kiwei kiwei ki bynta ba ka sorkar ka la mang pisa kyrpang na ka bynta ki paitbah.
Ha shuwa ban pynkut ïa katei ka prokram la sam ïa ki khusnam sha ki nongïoh bynta na ka skhim Pradhan Matri Awaas Yojana na ka bynta ban shna ïng, ki ba la pyndep hok ban shna ïa ki paiñkhana nangta la sam ruh ïa ki khusnam na ka bynta ki SHG, ki ASHA, bad kiwei kiwei.
Ïa kitei ki khusnam la sam da u bah Sraly Rashir sordar shnong jong ka New Nongstoiñ uba la shah khot kum u kongsan.