Nongpoh, Risaw 16: Kumba 8 tylli ki shnong ba don haka thaiñ khappud jong ka thaiñ Block II ha Ri- Bhoi District kila ioh ban pdiang ïaka kam pynroi ha kaba ïadei bad ka pule ka puthi, naka bynta ban shna bad tei ïaki iing skul ba thymmai bala mang kyrpang naka skhim Chief Minister Development Fund, kumba bun naki iing skul ha katei ka thaiñ kidei kiba shu pynlong haki iing Dorbar bad don ruh ki skul ba shu ker da ki siej malu mala bad tap da ki tin tang ban lait naka sngi u slap.
Kitei ki 8 tylli ki shnong bala ioh pdiang ïaka jingïarap ban tei iing skul ki kynthup ïaka shnong Umsder, Pdengtleit, Ummat 1, Ummat 2, Umlaper, Umhi, Sabuda bad ka Khliehumwang bala aiti ruh ïaka work order kaba mar T.8 Lakh ïa kawei ka skul da u MLA/MDC ka thaiñ u Bah Charles Marngar, ryngkat ka song pisa kaba mar T.50 hajar kawei ka skul ban kyrshan tulop ïaki nonghikai haka jingïalang kaba la long haka sngi ba ar ha Umlaper.
Kum ban shu kdew, ka thaiñ khappud Block II ka dei ka thaiñ kaba ju mad bun ki jingeh naka por shaka por khamtam, ka jingshah ieh khunswet ha kaba ïadei bad ki kam pynroi bad ka jingshah pynthud ki kam pynroi kiba dei jong ka sorkar Meghalaya haki bor sorkar jong ka Assam hynrei ha kane ka kynti kaba mynta bad nangne shakhmat kan nym don shuh shuh kano kano ka jingpynwit ne pynthut ïa ki kam pynroi kiba wan lyngba na ka Sorkar Meghalaya, kaba ïa kane la pyntip bad pynthikna da u Bah Charles Marngar MLA bad MDC ka Mawhati Constituency haka jingdonlang u Abhijit Kro u ba dei u MAC jong ka KAAC na Chinthong Constituency, West Karbi Anglong.
Na ka liang u Bah Charles Marngar u la ïathuh ruh, na ka bynta ban pynthikna ïa ka shong suk shongsaiñ jong ki nongshong shnong ha ka thaiñ Block II, dang shen u la leit hi da lade la arsien arwat sha Diphu, Karbi Anglong ban ïa kynduh ïa u CEM ka KAAC u Toliram Ronghang lem bad ki MAC jong KAAC, ban ïa kren sngewthuh jingmut bad ban pynthikna ïa ka shongsuk shongsaiñ jong ki nongshong shnong ha ka thain Block II.
Ha katei ka jingleit jong u sha Diphu u Bah Charles u la pyntip ba ka jingïakren kala long kaba seisoh bad la pynthikna ba nangne shakhmat kan nym don shuh kano kano ka jingpynthut ha kaba ïadei bad ki skhim sorkar kiba wan naka jylla Meghalaya ne Assam da ka jingïa tip lang na baroh arliang mamla kumba la ïa kut.
U Abhijit Kro u ba dei u MAC jong KAAC u ba wan ban sakhi lang ha katei ka sngi ka jingsam ïaki Work Order haka shnong Umlaper u la kyrshan ïaka jingkren jong u Bah Charles Marngar ban pynthikna ïaka shongsuk shongsaiñ bad ban pynskhem ïaka jingïakut jong ki hakhmat ki paidbah kiba la wan ban sakhi lang ha katei ka sngi.
Ha katei ka sngi naka liang ki nongïalam shnong bad ki nonghikai skul kila mih shakhmat ban pynpaw ka jingsngewkmen kaba khraw bad ka jingsngew nguh ïa u MLA bad MDC ka Mawhati Constituency namar kane ka dei ka sien ba nyngkong ba kum ki shnong ki ioh jingïarap naka sorkar ha kaba ïadei bad ka pule puthi khamtam ba haduh mynta ym don satia ka skul ba paka ha katei ka thaiñ, bad lyngba ka jingmang pisa naka skhim CMDF kan long ka jingmyntoi bad ka jingkyrkhu kaba khraw ïaki shnong khappud ba ki kmie ki kpa kim donkam shuh ban phah skul ïaki khun sha jngai nala iing.
Shuh shuh ki nongïalam shnong naduh ki nonghikai kila ai ruh ka jingkhublei ïa u MLA bad MDC halor ka jinglah jong u ban ïakren bad ka Assam ban pynthikna ïaka shongsuk shongsaiñ jong ki paidbah kumba ha ki por ba mynshuwa kila don ki jingkajia bad ki jingshah pynthud naka por sha ka por ba ki paidbah kim ioh satia ban pyntrei hok ïaki skhim hynrei naduh mynta u MLA bad MDC haka jingdonlang u nong mihkhmat na ka KAAC la lah ban pynthikna ba kim dei shuh ban dang jia nangne shakhmat bad ki paidbah ki dei ban don hapdeng ka suk ka saiñ.
