Shillong, Naitung 21: Dangshen u MLA ka Sohra u Bah Gavin Mylliemngap u la ïoh ban leit buh mawnongrim ka ban pynheh ïa ka Shillong College kaba ha Elaka Laitlyngkot.
Ha kane ka jingleit buh mawnongrim u MLA u la pynpaw ïa ka jingsngewburom ïa ka Elaka Laitlyngkot bad ka Shillong College kaba la pynurlong ïa kane ka jingphoh sniew bad kan urlong shisha. “Ha kane ka sngi ngi la lah ban buh ïa u mawnongrim ban pynïar ne pynheh ïa ka Shillong College campus ha Elaka Laitlyngkot. Ïa kane ka jaka la lah ban ïoh lyngba ki jingpyrshang kiba ratbah bad ki jingïatreilang jong baroh. Kadei ka sakhi jong ka jingaiti met bad mynsiem jong baroh khnang ban lah ban kyntiew ïa ka pule puthi ha kane ka thaiñ,” ong u MLA.
U la ong ruh ba lyngba kane ka jingpynheh ne pynïar ïa kane ka jaka pule kan ïarap ïa ki samla pule na shnong Pynursla, Sohra, Laitlyngkot, bad kiwei pat ki samla pule kiba don sawdong kane ka thaiñ ba kin ïoh ka lad ban bteng ki jingpule jong ki sha kane ka jaka kaba long hajan ka shnong ha ka jaka ba kin leit shaduh Shillong.
“Kane kadei ka kam kaba ratbah ym tang kaba shu pynheh ïa ka jaka, hynrei kaba ai lad pat ïa ki samla pule ban ïoh ka lad ban wan pule bad ban pynïar ïa ki jingpule jong ki, bad na kane kan wanrah ruh ïa ka jingkiew ha ka ïoh ka kot bad ban pynkupbor ïa ki samla pule jong kane thaiñ bad ka jaitbynriew hi baroh kawei. Da ka jingïatreilang ngin tei ïa ka lawei kaba phyrnai jong ki khun ki kti bad ka jaitbynriew baroh kawei,” ong u Bah Gavin.
