SHILLONG, Naitung 02: Ka Ophis treikam jong u District Sports Officer ka East Khasi Hills District, ha ka 28 tarik Jylliew, 2025, ka la plie ïa lai tylli ki Grassroots Centre kiba hap hapoh ka jingthmu jong ka Mission Football.
Kine ki kynthup ïa ka Laitkor Rngi Grassroot Centre ha madan Laitkor, ka Mawkdok Grassroot Centre ha madan Mawkdok bad ka Weilyngkut Grassroot Centre ha madan Dira.
Ha ka por 10 baje mynstep, u DSO ka East Khasi Hills District u la plie paidbah ïa ka Laitkor Rngi Centre ha ka jingïadonlang ki dkhot ka Dorbar Shnong Laitkor Rngi ha ryngkat bad ki dkhot ka Laitkor Sports Club bad ki khynnah kiba don hapdeng ka rta kaba 6 snem haduh 12 snem.
Nangta ha ka por 12 baje mynsngi, la plie ïa ka Mawkdok Centre ha ka jingïadon lang ki dkhot ka Dorbar Shnong Mawkdok, ki dkhot jong ka Mawkdok Sports Club bad ki khynnah rit kiba hap ha ka rta kaba 6 snem haduh 12 snem, bad la wan Kongsan da u M.L.A ka thaiñ, u Bah G.Mylliemngap.
Khaduh ha ka por 3 baje nohphai sngi la plie paidbah ïa ka Weilyngkut Centre ha ka jingïadon lang ki dkhot jong ka Dorbar Shnong Weilyngkut, ki dkhot nongkitkam jong ka Weilyngkut Grassroot Centre lem bad ki khynnah rit kiba hap ha ka rta ba 6 snem haduh 12 snem. Hangne la wan Kongsan da u Bah S.Lyngdoh, M.L.A.
