Guwahati, Nailur 25 : Ka Lokpriya Gopinath Bordoloi International Airport (LGBI), lane ka Guwahati Airport, ka la pynkhreh mynta ïa ka plan ban kit ïa ki mar ba pynmih na ka thaiñ Shatei Lam Mihngi sha kylleng ki jaka jong ki Ri ka pyrthei hapoh ka 24 kynta. Kane ka kad liengsuiñ ka la sdang mynta ban pyntrei ïa ki jingtei kiba donkam ha kaban pynurlong ïa kane ka thong.
Ka Domestic cargo terminal jong kane ka Kad ka la lah ban wanrah bad pynpoi ïa ki mar (cargo) ba palat 1000 metric ton ha kine ki lai bnai ba la leit noh ba kynthup ïa 146 ton ha u Jylliew, 411 ton ha u Naitung bad 426 ton ha u bnai Nailar mynta u snem.
“Ka Assam bad ka Thaiñ Shatei Lam Mihngi ki don shibun bah ki lad ban pynpoi ïa ki mar ba lah ban pyut lyngba ki kad liengsuiñ. Nalor u Khaw, u slasha bad ki orchid, ka thaiñ ka don ruh shibun ki mar ba phylla kiba lah ban die ha kylleng sawdong ka pyrthei. Bhut Jalakia, Sohtrum, sying, kazonemu bad kiwei ki jhur lane ki mar rep jong ka thaiñ ki lah ban bsa ïa ki jaidynriew ha kylleng ki ri ka Pyrthei naduh ka Dubai haduh Singapore” ong u Chief Airport Officer ka LGBI.
Ula ong ruh “Ngi la tei mynta ïa ki jingtei ba ki mar ki mata kin poi hapoh ka 24 kynta sha ki Ri ka pyrthei. Da kaba ïatreilang bad ka Sorkar Assam, ngi la thaw mynta ïa ka ïew kit mar da ki liengsuiñ ki ban wanrah bad kyntiew ïa ka ïoh ka kot jong ki nongshong shnong ka thaiñ”.
Kane ka cargo terminal ka don mynta haduh 550 sqare meter bad ka plan thymmai ka long ban tei ïa ka International cargo terminal building ha ki snem ban wan.
