Ba nang kiew ka jingkhluit ka mariang, da ka SEEAP pynlong ka Ministry of Power ha Shillong

Shillong, Nailur 25 : Ka Ministry of Power jong ka sorkar pdeng lyngba ka jingkyrshan jong ka Bureau of Energy Efficiency (BEE) ha ka sngi Nyngkong ka la pynlong ïa ka rynsan ia syllok bad ki heh sorkar jong ki tnad bapher ka sorkar jylla na ka bynta ban tehlakam ia ka jingnang kiew ka jingkhluit ka mariang katba nang iaid ki sngi.
Ia katei ka rynsan iatai ba la tip kum ka State Energy Efficiency Action Plan (SEEAP) la wan ban plie da u Director, Finance ka MeECL, u Ramakrishna Chitturi, IAS kum u Kongsan ryngkat ka jingdonlang u Bah MF Mawlieh Senior Electrical Inspector, Inspectorate of Electricity bad Meghalaya State Designated Agency for Energy Conservation, Bah I. Tariang, Deputy Electrical Inspector kumjuh ruh u Manager ka Deloitte, u Nitish Kumar.
Kiba shim bynta ha katei ka prokram ki kynthup naduh ki heh sorkar bad Engineer na ka tnad PWD, MeECL, Industries, Urban Affairs, MUDA, Shillong Municipal Board bad kiwei kiwei ki tnad jong ka sorkar Meghalaya.
Ka phang pdeng jong ka jingïatai ka long kumno ban pynduna ïa ka jingpynmih ïa ka lyer khluit ne lyer jaboh bad ruh ka jingnang ban tyngkai ïa ka um. Nangta ka mih ruh ka jingïakren kumno ban tyngkai ha ka rukom pyndonkam ïa ka bording lane ïa kino kino ki bor kiba mih na ki marpoh khyndew la ka long na u dewiong, petrol, diesel bad kiwei kiwei kiba pynjakhlia mariang bad wanrah jingkhluit ïa ka pyrthei.
Ka la don ruh ka jingïakren halor kumno ban tyngkai wat ha ka rukom pyndonkam ïa ki kor ki bor ha ki iing ki sem ha kane ka juk mynta kiba pyndonkam da ka bording bad khamtam eh ban thung kham bun ki dieng ki siej ha ki sawdong sawkun.
La banjur ruh halor ki lai tylli ki phang ban pynduna ia ka jingpynjaboh mariang kata naduh ki karkhana, ki kali bad ruh ha ki jingtei ban lait na ka jingkiew stet ka jingkhluit ka mariang.
Haba kren bad ki lad pathai khubor, hadien ka jingïalang u Bah MF Mawlieh, Senior Electrical Inspector, SDA Meghalaya u la ïathuh ba ha katei ka jingïalang ki la shim ruh ïa ki jingai jingmut na ki heh sorkar kumno ban ïaid shakhmat ïa ka kam.
U la ong ba ki sienjam ba kin leh kan ïarap ruh ïa ki tnad sorkar ba kin lah ban treikam ne pyndonkam da ki buit kiba thymmai kiba lah ban pynduna ïa ka jingpyndonkam ïa ka bor (energy) hynrei kiba kham neh slem bad kiba ai jingmyntoi.
Shwa kane, u Bah Mawlieh u la ai nuksa ba kum ïa u dewiong, bun ki karkhana ha ka jylla ki pyndonkam ban pynmih ïa ka bording ban pynmih pat ïa ki mar ki mata ba ki shna. “Kane ka wanrah ïa ka jingkhluit bad ka pynjakhlia ruh ïa ka mariang da kaba pynlong ïa kata ka global warming lane ka jingkhluit ïa ka pyrthei,” u la ong.
Shuh shuh u la bynrap ruh ba katei ka rynsan ïatai jong ki, ka long ban wad ïa ki lad ki lynti khnang ban pynduna ïa ka jingpyndonkam ïa u dewiong lane ïa ki marpoh khyndew kiba pynjaboh bad pynkhluit ïa ka mariang.
Ha kawei pat ka liang u ong ba ka bor kaba mih na ka um kadei kaba khuid tam hynrei ïa kane pat ym lah ban pyndonkam baroh shisnem namar tang shu poi ka aiom tyrkhong la hap ban thied bording na shabar.
La ïoh ruh ïa ka jingkren kaba bniah bha na u Kongsan kumjuh na u Manager ka Deloitte kumjuh na u Bah I Tariang.