Shillong, Lber 26 : Ka Kimtera D Sangma ka la ïoh ban khyrwit jem da 90 ron bad khur lai wicket tang ha ki 2 over ha kaba ka South Garo Hills District Cricket Association ka la pynliem da 174 ron pyrshah ïa ka Shillong Cricket Association ha ka lympung ïalehkai kriket U-14 Girls Inter District Cricket T20 Tournament 2023 ha ka jingïalehkai kaba la long ha ka sngi Saitjaiñ ha Nongstoin.
Ka SGH kaba la hap ban tied nyngkong ka la lah ban kamai haduh 234 ron duh tang 1 wicket ha baroh ki 20 over bad ha ka jingkawang bol ka la lah ban pynkhyllem lut ïa baroh ki wicket jong ka SCA kaba kamai tang 60 ron.
Ka SCA ha ka jingshisha ka la lah ban ïalehkai bha mar ba sdang ka jingkawang bol ha kaba ka Joanna Pyngrope tang ha ka shi bol ka la ïoh ban pynhap 1 wicket ai kamai 37 ron, hynrei ka Kimtera bad ka Tempali Basumatary ki la kamai ron lang da 234 ron.
Ka Kimtera ka ïoh ban khyrwit 12 tylli ki four ha ka jingkamai ron ba khlem shah pynhap wicket da kaba kamai 90 ron na ki 68 bol, katba ka Basumatary ka kamai 89 ron na ki 69 bol bad heh haduh ba kut ki over, ka la ïoh ban khyrwit 13 tylli ki four.
Haba beh ïa katei ka thong, ka SCA ka khlem lah ban tied ïa ki bol ba la kawang da ka SGH ha kaba ka la shah pynhap lut baroh ki wicket da kaba kynjoh tang sha ka 60 ron. Ka Kimtera ka khur 3 wicket ai kamai 6 ron, ka Shreya R Marak 3 wicket ai kamai 10 ron bad ka Mania Sangma 2 wicket ai kamai 12 ron. Ka Basumatary ka ïoh ban pynhap wicket lyngba ka stumping kaba la ïoh ban khur ïa ka nam Player of the Match na ka jinglah jong ka ban ïalehkai bha la ka long ha ka kamai ron bad ka jingïoh khur wicket.
