Ban rat diengkhong ïa ka jingpang TB la pynlong da ka Walkathon hapoh ka Jylla

0

Shillong, Lber 26 : Da ka thong ban rat diengkhong ïa ka jingpang Tuberculosis hapoh ka Jylla, ka ophis jong ka Tuberculosis (TB) Meghalaya kum shi bynta jong ka World Tuberculosis Day ka la pynlong da ka rally bad ka Walkathon ha Nongbah Shillong ha ka 24 tarik Lber 2023.
Ïa katei ka Walkathon la pynlong ha ryngkat ka jingïatreilang bad ka Molbio Diagnosis Pvt. Ltd. Mynta u snem la pynlong ïa katei ka Walkathon kaba nyngkong eh ha ryngkat ka phang pdeng kaba ong Hooid! Ngi lah ban pynduh ïa ka jingpang TB (Yes! We can end TB).
Ïa ka prokram la sdang da ka jingïaid paidbah ïa kaba la kaweh ïa ka lama da ka Kong Tracy Kharkamni, kaba dei ka State ACSM Coordinator, State TB Office kaba la sdng na ka ophis Directorate of Health Services, Health Complex, Laitumkhrah bud pat sa da ka Walkathon ïa kaba la kaweh ïa ka lama da u Dr. Dukebingstone Lyngdoh, Medical and Health Officer, Civil Hospital, Shillong kaba la sdang na Additional Secretariat haduh ka ophis State TB ha Mawprem.
Ha katei ka prokram la wan ban ïashim bynta shitrhem haduh 210 ngut ha la ki jong ki kyrdan ïakob mareh, na ki kynhun, ki shnong bad ki jaka pule. Hadien ka Walkathon, la pynlong ka jingïalang pynshai paidbah halor ka jingpang TB bad ba kumno ka Sorkar Jylla ka buh ka thong ban ïakhun pyrshah pynduh pyndam ïa jingpang TB ba la ai da u Dr. Marcel Mawrie, State TB Officer, Meghalaya ha Reid Provincial Chest Hospital, Mawprem.
U la ong ba ka Jylla ka buh ka thong ba ha u 2025 kan pynduh pyndam ïa ka jingpang TB bad namarkata tang ka tnad ka koit ka khiah marwei kan ym lah ban pynurlong ïa katei ka thong khlem da ai lem ka jingkyrshan jong ki paidbah.
Ha kane ka sngi la sam ruh ïa ki khusnam nongjop ha ka jingmareh Walkathon, ha ka liang ki kynthei ïa ka nam ba nyngkong la jop da ka Emmiwaka Shadap, ka Ibasharai Kurkalang ïa ka nam ba ar bad ïa ka nam ba lai la jop da ki arngut ka Ribanun Lyngdoh bad ka Soulnavi Wanniang.
Ha ka liang ki shynrang, ïa ka nam ba nyngkong la ïoh rah da u Ferick Kitboklang Syiemlieh, ba ar u Bipin Kumar Ray bad ba lai u Badonsing Tham bad u Biplob Deb.
Ha katei ka jingïakob la sam ruh ïa ki khusnam kyrpang sha ka Abha Nongrum ba dang 5 snem ka karta bad ka Kong Shyamali Chakraborty ba la 53 snem ka karta.

Leave A Reply

Your email address will not be published.