Khur jingjop ka PFR, Mylliem Grass Root, Rangdajied FC bad Umphyrnai SC

Shillong, Lber 26 : Ka PFR, Mylliem Grass Root, Rangdajied FC bad ka Umphyrnai SC ki la khur jingjop ha ka lympung ïalehkai phutbol Under-19 (Boys) Football League 2023 ba pynïaid da ka Shillong Sports Association (SSA) ha ki jingïalehkai kaba la long ha ka sngi Saitjaiñ ha madan Polo.
Ka PFR ka la khur jingjop da kaba pynliem da 5-0 kol pyrshah ïa ka Mawpat SC ha ka jingïalehkai kaba nyngkong ha katei ka sngi, ka Mylliem Grass Root ka la pynliem da 6-1 kol ïa ka Mawkriah West SC ha ka jingïalehkai kaba ar, ka Rangdajied FC ka la pynliem ïa ka Challenger FA da 7-0 ha ka jingïalehkai kaba lai bad ha ka jingïalehkai kaba khatduh jong katei ka sngi ka Umphyrnai SC ka la pynliem da 2-0 ïa ka Them Rangshken A.C.C.
Ha ka jingïalehkai kaba nyngkong, ka Pay For Right ka la ïoh ban thep ïa kitei ki san kol lyngba u Sylvester Nongneng uba la thep marwei saw kol ha ka minit ïalehkai ba 2, 14, 22 bad 44 minit katba ïa ka shi kol la thep da u Wanrahbok Kharsati ha ka minit ba 30.
Ka Mylliem Grass Root ruh ka la pynliem suk lyngba ki saw kol ba la thep da u Brayden Thawmoit ha ka minit ba 13, 33, 36 bad 40, u Dakermi kharbudnah (42min) bad u Dharen Elizer Syiemlieh (49min) ki ïoh ban thep maw shi kol, katba ïa ka shi kol na ka bynta ka Mawkriah West SC la thep da u Leonerd Patrick Nongbri (23min).
Ha ka jingïalehkai kaba lai, ka Rangdajied FC ka la pynliem kput da 7-0 ïa ka Challenger FA, ha kaba u Embha M Kharkongor marwei u ïoh ban thep haduh san kol ha ka minit ba 15, 21, 29, 35 bad 38 katba ïa ki ar kol la thep da u Tosanbha Pathaw Syngai ha ka minit ba 27 bad 47.
Haba phai sha ka jingïalehkai kaba khatduh, ka jingïakhun ka long kaba mar ïakhaid ha kaba ka Umphyrnai SC ka ïoh ban pynliem tang da ki 2 kol bad ïa kitei ki ar kol la thep da u Eliezer Kharkongor ha ka jingïalehkai ba dang ïaid 6 minit bad u Dibormy Kharkongor u thep ha ka minit ba 43.