Ki nonglehkai ba paw nam na ka jylla lada ngi peit ki dang duna palat lada ngi nujor bad ki para jylla ba rit ha ka thaiñ Shatei Lam Mihngi ka ri. Ngi ïohi ba kiwei kiwei ki jylla ba don mar jan bad ngi kum ka Manipur bad Mizoram ki la tam shakhmat ha ka jinglah ban pynmih ïa ki nonglehkai kiba ïoh jingithuh ha ka ri. Dang ha ki khyndiat snem ba a leit ki la mih katto katne ki nonglehkai ba kynsai na ka jylla kiba ki klob paw nam ka ri ki ïaknieh ban ïoh soi contract ba kin lehkai na ki.
Lada ngi phai dien dang tang ha kine ki khyndiat snem eh ba la leit ngi ïohi ba u Eugeneson Lyngdoh uba la shah jied noh kum u MLA, u Ricky Shabong, Redeem Tlang bad kiwei de kiba ngin dang lah ban ñiew kyrteng ki la lah ban tynshaiñ ha ka kam lehkai phutbol. Lah ban ong ba kine ki ranglehkai kiba ka jylla ka la pynmih ka dei na ka jinglah jong ki hi bad ka jingdon kabu ruh ban shim ïa ka kam lehkai kumka kam im ja hynrei katto ngut eh ki khynnah na ki nongkyndon kiba ïoh lad ban tynshaiñ wat a ki don ka sap kaba kynsai kaba ryngkat dor bad ki nonglehkai na ki ri jong ka pyrthei.
Shiban lah ban ong ba ka jinglehkai football ha ka jylla khamtam eh ha ka jaidbynriew ka longdoh longsnam naduh ki por kiba mynshuwa eh. Leit phi sha kino ma kino ki shong kiba rit ne kyndong eh jong ka rilum Khasi, ki bym pat don bording ilektrik ne surok, moblie network ne skul hynrei phin lap beit ba ka madan lehkai phutbol kam ju jah ha kine ki shnong.
Sngew dei ban kylli wat haduh katne ka jingieid phutbol balei pat ngi dang duna eh ki ranglehkai kiban mih khmat ïa ki klob pawnam bad ïa ka ri. Hato dei ba kim don sap ne hato dei ba kim ïoh lad ne hato ki kloi than ka shong kurim bad ka leh rangbah….ki hajar ki jingkylli kiba ngin hap puson bad wad ïa ka daw. Lada phai sha ka jingïarap ka sorkar ban kyntiew ïa ki samla khamtam eh ïa ki heprit kiba donsap ha kane ka kam ruh ka dang duna shaba palat la 50 snem tam ngi ïoh jylla hynrei ki Football Acedemy ki dang duna palat katta ruh kiba pynïaid da ki riew shimet hynrei katno ngut eh ki kmie ki kpa na ki thaiñ nongkyndong kiba lah ban kyrshan ïa ki khun ba ki leit shah pyntbit ha kine ki shlem ai jinghikai.
Lada ngin peit shuwa tang ïa ki madan phutbol katno tylli eh ki madan kiba ryngkat dor bad ki madan sha kiwei ki jylla lah ban ong khyndiat ngut eh ki khynnah rit kiba ïoh ban lehkai ha ki madan phlang plastik hynrei kiba bun hi ka jingim lehkai jong ki ka kut tang ha ka madan ktieh ne madan phlang tang da ki kjat khlem pat ïoh phong tang ki but ruh. Wat ki kmie ki kpa lada ki khun ki kwah long nonglehkai yn ym don hi kiba kyrshan ïa kane ka jingthmu namar ki la ïohi lupa ba kam don ka lawei kaba thikna bad katto eh hi ruh ki kmie ki kpa kin lah ban shan ban siew bai skul bad bai shah hikai pyntbit ha ka kam lehkai. Lehse kine kidei ki daw ba ki nongïalehkai phutbol kum kiew ha ka jylla namar ka jingbym biang ki lad jingïarap khamtam na ka sorkar jylla namar lada ngi ïanujor tang bad ki jylla ka thaiñ shatei lam mihngi ka ri, ki ju kloi ban ïarap khamtam ban phaikhmat sha kito kiba don shisha ka sap ïalehkai da kaba ai ki jingïarap ba kin dang lah shuh shuh ban pyntbit ïalade.
Ngin peit ïa ka jylla jong ngi ka Sport Policy ruh dang tang ha sla wat la la mynjur naduh ki khyndiat snem ba la dep hynrei wat a katta sngew dei ban ai jingïaroh ïa ka sorkar barim kaba la pyrshang ban maitphang da kaba ka ai song pisa bad ban sdang ai scholarship ïa ki samla pule ba la mihkhmat ïa ka jylla ha ki kam lehkai bad wat la ka kaei kaba ka la leh kam pat dei kaba heh. Ki nonglehkai hi ym tang ha ka phutbol hynrei ha kiwei pat ruh ki jaid jinglehkai ba ban long nonghikai la kha lupa ym dei ba dang thaw hynrei kaba donkam ka long ba ïa kito kiba donsap ban kyntiew bad btin lynti.
Kum ka jylla dang donkam ban dang pynbha ïa ka kyrdan ka jinglehkai kaban ryngkat dor bad kaei kaba kiwei pat ki jylla ki la kot. Ngin phai sha ka madan lehkai, ne ka jingleit wad ïa ki heprit donsap sha ki shnong ba kyndong eh, ka jingpynshlur lyngba ki song pisa ha ka dur ka scholarship bad ka jingpynkha ne kyrshan pisa ïa ki acedemy ban hikai ïa ki heprit donsap ban ban jied ruh kino kiba don ka talen ka ban lah ban kot bor ban kynjoh sha ki kliar ka nam lehkai.
