Mawkyrwat, Rymphang 20: U Additional Deputy Commissioner jong ka South West Khasi Hills District u la ai ki jingkyntu ïa ki paidbah jong ka distrik ba kin long kiba phikir lada wan ka jingtied u pyrthat, thaba ka lei-lieh, jur ka lyer, wan u slap bad jinghap phria.
Halor kane ka bynta, u la ai ruh ki katto katne ki jingbthah ba ki paidbah ki dei ban leh kata ban sangeh ban mih na ïing ha ka por ba jur slap bad lyer, laitnoh ki kam ba kyrkieh, phikir ha ki jaka madan, trai dieng bad ki nar ha ka por ba tied pyrthat, wad ïa ki jaka rieh kum hapoh ïing bad ha ki ïing baskhem.
Nangta, wat pyndonkam ïa kino kino ki tiar electronics ne ki pipe um ha ka por ha thaba ka lei-lieh, peit ne pynskhem bha ïa kino kino ki jingtei ba la sator, wat buh ïa ki kali ha trai dieng, post light bad kiwei kiwei ki jingtei namar ki lah ban kyllon ha ka por ba jur lyer.
Ym tang kata, la bthah ruh ba kin shongkhop hapoh ïing bad jngai katba lah na ki jingkhangïit ha ka por ba jur lyer, phikiar ban nym ïaid ha ki jaka ba lang um ki surok ne ki jaka them, shongkhop hapoh ïing ne ha ki jaka ba skhem ha ka por ba jur phria bad kaba kyrpang ka long tyngkai ïa ki jingbam na ka bynta ki jingdonkam kyrkieh kum ki bam ba tyrkhong, ka um kaba khuid bad ki dawai dashin.
