Shillong, Rymphang 20 : Ka Lawsohtun SC ka la ïoh ban pynliem haduh 4-2 kol ïa ka Umphyrnai SC ha ka lympung ïalehkai jong ka SSA 1st Division Football League 2023-24 kaba long hynne ka sngi ha madan SSA, Polo.
Ïa ki kol jong ka Lawsohtun ha kane ka sngi la ïoh ban thep da u Joinbor Nongspung tang ha ka minit kaba 9 jong ka kylla step bad pynbud sa shi kol pat ha ka minit ba 67 jong ka kylla miet.
Katba ïa ki ar tylli kiwei pat ki kol la ïoh ban thep da u Rangdajied Rynjah ha ka minit kaba 65 bad minit ba 79 jong ka kylla miet.
Haba phai pat sha ka Umphyrnai, katei ka kynhun tang ha ka minit kaba 37 ka la ïoh ban pynïakhaid noh ïa ka jingïakhun lyngba ka kol na u Ridingstar Kharkongor bad kumta tad haduh ban da kut ka kylla step ka jingïakhun ka la neh da ka jingkhaid mar 1-1 kol.
Hynrei wat hadien ba ka Lawsohtun ka la ïoh ban lamkhmat biang sa ar kol kata ha ka minit kaba 65 bad 67, pynban ka Umphyrnai ka dang ïoh ban pynphai biang sa shi kol lyngba u Damanglang Kharbangar ha ka minit kaba 77.
Watla ka la Umphyrnai ka shah lamkhmat da 3-2 kol hynrei ka ïakhun tyngeh ban ïoh pynïakhaid biang pynban dei ha ka minit kaba 79 ka Lawsohtun ka la ïoh biang sa shi kol ban pynskhem artad ïa ka jingthep kol da 4-2 kol bad khur suk ïa ka jingjop ha katei ka janmiet. Ka jingïakhun ha ka sngi Balang 21-02-2024 pat kan long hapdeng ka Malki SC pyrshah ïa ka Mylliem SC ha ka por 2:45 PM nohphaisngi.
