Shillong, Rymphang 20 : Ka kynhun ïalehkai jong ka Meghalaya ka la mad ïa ka jingshah rem da ki san wiket ha ka Hyderabad ha ka final jong ka Ranji Trophy (Plate Group) kaba long ha kane ka sngi Ba-ar ha Rajiv Gandhi International Cricket Stadium, Hyderabad.
Haba bteng biang ïa ka jingïakhun da ki 71/1 ha ka por mynstep da kaba donkam sa 127 ron ban jop, ka Hyderabad ka la duh haduh saw wiket hynrei ka la lah pat ban pyndep ïa ka thong lyngba ka hynriew ron na u Chandan Sahani.
Ha kawei pat ka liang, ki rangkawang bol jong ka Meghalaya ki la ïalehkai bha ha kane ka sngi ban tehlakam ïa ka jingïoh kamai ron suk ki rangïalehkai ka Liang Pyrshah. Hynrei ka jingdon jong u rangïalehkai Indian Premier League (IPL) u Tilak Varma ban kamai haduh 64 ron na ki 50 bol ka la pynlong ïa ka kynhun trai jaka ban khur ïa ka jingjop.
Ïa ka wiket jong u la ïoh ban pynkhyllem da u Raj Biswas uba la khur shi wiket bad ai kamai pat 49 ron katba u Chengkam Sangma uba khur lai wiket bad ai kamai 47 ron u la dei u rangkawang bol ba kynsai tam ka Meghalaya nalor u Aryan Borah uba khur shi wiket la 13 ron.
“Ka MCA ka sngew sarong na bynta ka kynhun ïalehkai Ranji baroh kawei na bynta kane ka samoi,” on gu Secretary ka Meghalaya Cricket Association, u Bah Gideon Kharkongor. Shuh shuh u ong ruh ba kane ka aiom kadei ka aiom ïalehkai kaba itynnad tam ïa ka kynhun naduh u snem 2018 ba ki pynïasoh bad ka BCCI.
Shuh shuh la ong ba watla ha kane ka samoi ka kynhun ka mad bun ki jingeh, kata lai tylli ki jingjop ha ka round robin stage ka mad pat ar tylli ki jingshah rem bad bud sa ka jingjop ha ka semi final. Kane baroh ka jia hadien ba ki bor pynïaid jong ka MCA ki la shim ïa ka rai ban ym sei ïa ki rangïalehkai ba shu khot na shabar jylla ha ka sien kaba nyngkong eh hynrei ban shaniah beit ha ki rangïalehkai trai jylla.
Kumta, hadien ba la poi sha ka final, baroh ar kynhun kata ka Hyderabad bad ka Meghalaya ki la ïoh pat ban rung sha ka kylla kaba bud jong ka samoi ban wan ha ka thup Elite Groups jong ka Ranji Trophy.
Ka jinglah jong ka Meghalaya ban ïalehkai bha ka la pynlong ruh wat ïa ki bor pynïaid jong ka Hyderabad Cricket Association bad kumjuh na ka North East Cricket Development Committee ban ai jingïaroh ïa ka kynhun ïalehkai ka jylla.
