Nongpoh, Jymmang 28: Ka seng HITO Ri-Bhoi District hapoh ka jingïalam jong u Banpynskhem Kharnaïor kum u President bad u Kenny Nongrum Secretary, Bah Apbor Nongrum Vice President bad ki dkhot kila leit ban tied tin ha iing u MLA Umsning kum ka jingkyrsiew thiah ïaki MLA jong ka Ri Khasi ba kim dei ban shu thiah thai bad kuman, hynrei ki dei ban kren eiei ha kaba ïadei bad ka jingïakhih bad dawa ban pynthymmai noh ïa ka Reservation Policy haka jylla.
Ka HITO ka la leit tur sha ïing sah jong u MLA ka Umsning Constituency, u Dr. Celestine Lyngdoh ban kyrsiew thiah ïa u bad ban pynkynmaw ruh ïa u ba um dei ban sngap jar lane ban shu hun ïaka jinglong jingman jong ka Reservation policy jong ka jylla kaba la noh shilliang hapdeng ka iohkam iohjam ki khasi bad ki garo.
Haba kren sha ki lad pathai khubor, u Samla Kenny Nongrum General Secretary ka HITO u la pynpaw ka jingsngewsih kthang ban ïohi ïaka jingleh bym suit ñiew jong ki MLA khasi kiba shu long MLA khlem lah ban ong eiei halor kane ka jingïakhih ban pynkylla bad pynthymmai noh ïaka Reservation Policy, namar kata ka HITO ka hap ban shim ïa kane ka sienjam ban pynkyndit bynriew ïa baroh ki MLA ba kin leh eiei bad ba kin kren sha ka Sorkar jylla halor katei ka mat kaba ktah ïaki samla ka bri u Hynñiewtrep.
Shuh shuh u la pynpaw ruh, ka jingtied tin ha kane ka sngi ha khmat ka ïing u MLA ka Umsning kam da dei eh ban pynrem lade ban kynnoh, hynrei ka dei ka dak ban pynkyndit thiah ba kim dei ban shuh sngap mynthi bad ban shu hun ba kin ïohi ba ki samla khasi kin shah ñion beiñ.
U la pynpaw ruh, haka jingïakren phone bad u Dr. Celestine,hadien ba lap ba khang tala ka ïing, u Dr. Celestine u la ong ba u dang don shabar ka jylla bad u la ong ruh ba un sa leit sha ki paidbah ban pynshai halor ka Reservation policy “, la ïathuh u bah Kenny.
