Leit pynïasoh TMC u MDC barim ka Balachanda

0

Shillong, Naiwieng 30 : U MDC barim ka Balachanda, u Sofior Rahman ryngkat bad 40ngut ki paidbah na ki sengsaiñ pyrthei bapher bapher ha ka sngi Balang ki la leit ban pynïasoh sha ka All India Trinamool Congress ban pynkhlaiñ shuh shuh ïa ka party na ka bynta ka elekshon MLA kaban long ha u 2023.
U Rahman udei ruh u State President barim jong ka Minority Morcha, BJP Meghalaya bad ruh kum u nongïalam barim ka NPP na Rajabala.
Ryngkat bad u Rahman, Mostopha Kabir bad Abdul Jolil Sheikh la pdiang sngewbha ïa ki da u MLA ka Rangsakona ba dei ruh u nongïalam ka party ha ka jylla ha ophis TMC kaba don ha West Garo Hills.
Katkum ka kyrwoh la ongba u Kabir udei u nongtrei mon sngewbha bad ruh u dkhot barim ka NPP uba ha u 2021 u la ïakhun ïa ka elekshon MDC kum u kyrtong shimet na Balachanda katba u Sheikh pat u dei u president jong ka Meghalaya Muslim Welfare Association bad u nongïalam ba paw jong ka NPP na Rajabala.
Kiwei pat kiba donlang ha kane ka prokram ki kynthup naduh ka State Mahila jong ka TMC ka Selma D Shira, bad ruh u TMC State General Secretary u Mukul Das.

Leave A Reply

Your email address will not be published.