Shillong, Naiwieng 30 : Ka BJP ha ka sngi Balang ka la kam ba kan pyntikna ban pynïoh ïa ka jingïada bad ka jingshngaiñ jong ki paidbah nongshong shnong lada ka wan ha ka bor ha u 2023.
“Ha ka jingmih jong kine ki jingjia, ka la i donkam ban don noh da ki jingïada kiba kham khlaiñ ban ïada ïa ka jingim bad ka jingdon jingem jong ki paidbah la kadei ïa kito kiba sah ha ka jylla lane kito kiba leit shabar na bynta ka kam ne leit kai. Ka BJP kan pyntikna ïa kane hadien ba ka la thaw ïa ka sorkar hadien ba la dep ka elekshon MLA,” ong u President ka BJP, Bah Ernest Mawrie ha ka kyrwoh.
Ha kajuh ka por u Bah Mawrie u la ong ruh ba ka BJP ka don ïa ka thong ban aibor ïa ki bor pahara ban pyntikna ba kin don ha kylleng ki bynta jong ka jylla bad ruh ban don ïa ki kyndon kiban pynsngewthuh ïa ki samla ba kin ym shim ïa ka aiñ ha ki kti lajong.
Shuh shuh u la ong ruh ba ka suk ka sain bad ka jingshong shngaiñ kadei kawei na ki mat ba kongsan tam jong ki paidbah ka jylla ha kane ka por ba mynta.
U la kdew ruh ba ki jingjia ïa kulmar dang shen ka la ktah bha ïa ka jylla ha kiba bun ki liang. U ong ruh ba ka burom jong ka jylla ha ka ri bad ha ka pyrthei baorh kawei ka la shah ktah jur da kaba bynrap ba wat ka kamai kajih jong ki paidbah ha ka jylla ruh ki sahkut lut man ka por haba don kum kitei ki jingjia.
U la kdew ruh ba ka kam jngohkai pyrthei kaba dei kawei na ki lad kamai kaba junom ïa ka jylla ka la ngat lang ha kitei ki jingjia ha kine ki khyndiat snem. U ong ruh ba wat ka pule puthi ruh ka la ngat lang ha katei ka apot namar bun ki khynnah skul bad ki samla pule ki im ha ka jingsyier bad ka jingartatien ïa ka lawei. Kumta na ka liang jong u, u la pynpaw ba kum ka party hi kam kwah da lei lei ba kin jia.
