Kham shitrhem ki samla khappud ïa ka ishu dawa Khasi Jaiñtia State : HSPDP

Shillong, Naiwieng 30 : Ka HSPDP ka la kam ba ki samla ba sah ha ki shnong khappud ki kham shitrhem ban tip kham jylliew shuh shuh halor ka ishu Khasi Jaiñtia State lane ka ishu dawa jylla Khasi Jaiñtia la ka long.
Haba kren bad ki lad pathai khubor hadien ka jingïalang jong ka HSPDP Youth Wing, u President jong ka, Bah Sandondor Ryntathiang u la ong ruh, “Ngi pan ïa ka jingkyrshan jong baroh ki 36 ngut ki MLA bad ruh ki MDC jong ka rilum Khasi Jaiñtia ba kin kyrshan lang ïa kane ka jingïakhun ban ïoh noh la ka jong ka jylla.”
Shwa kane, utei u nongïalam ka HSPDP Youth Wing u la pyntip ba katei ka mat ïakren halor ka Khasi Jaiñtia State ka mih hadien ba ki la pynlong ïa ka jingïakob thoh esse dang shen na bynta ki samla pule ka jylla.
“Kaba kham sngewtynnad ka long ba ki khun samla jongngi na ki thain khappud ki ïa shim bynta shitrhem bha ban tip shaphang ka Khasi Jaiñtia State,” u la ong haba kren bad ki lad pathai khubor hadien ka jingïalang jong ka CEC ha kane ka sngi Balang.
Nalorkata, u la ïathuh ruh ba kim kwah ba katei kan kut tang ha ka ïakob thoh esse bad kumta la shim da ka rai ban pynlong da ka seminar halor katei ka mat ha ka 05tarik u Nohprah ha Dinam Hall.
La pyntip ruh ba ha katei ka seminar yn wan naduh ki khrawpyrkhat ka Jaidbynriew, Dr. LS Gassah ba dei ruh u Professor ba la shongthait na skulbah NEHU kumjuh ruh uwei na ki stad-aiñ samla Robertjune Kharjahrin.
Na ka liang ki nongïalam ka HSPDP Youth Wing u la pyntip ruh ba ki khot ki wer ruh ïa baroh ki nongmihkhmat paidbah haduh ki riewshemphang na rilum Khasi- Jaiñtia ban kyrshan lang ïa katei ka mat dawa Khasi Jaiñtia State bad ruh ban wan shim bynta lang ha katei ka seminar.
Ha kajuh ka por u la ïathuh ruh ba kum ka party ki la pynkhreh ba ha ka 15tarik u Nohprah ba kin leit sha Delhi ban pynsngew ïa katei ka mat jingdawa ban ïoh noh la ka jong ka jylla kumba la maitphang da u President barim jong ka party, (L) Bah HS Lyngdoh.