Nongstoiñ, K’lyngkot 4: Ka Hynñiewtrep Youths Council HYC West Khasi Hills District hapoh ka jingïalam samla Lumlang Kharsyiemlieh President ryngkat ka HYC Nongstoiñ Circle, ryngkat ki dkhot bad nongïalam ka Nongkhnum mynta ka la ïoh ban leit jingïarap ïa ka ïing ka kong Bisida Marshra na ka Shnong Sangriang, kaba la mad ïa ka jingjia pluh ïing jong ki ha ka 27.12.2024 ha ka por 12 baje shiteng sngi, katba ki dang leit ha jaka khawai Khristmas hapoh shnong. Ka jingjia katkum ka jingïathuh ki trai ïing, ka lah ban dei na ka jingthut ha ka bording Electric, hynrei ym don ka jingjia ei ei ba sngewsih ïa ki mynsiem briew.
Ka Seng ka la ïoh ban pynlong ka jingïalang kaba lyngkot bad na ka liang u Babu O.Sangriang Sordar Shnong Sangriang, u la ong ka Shnong ka la ïarap katba lah wat ha I por ba jynjar ne khim ba kin ïoh ban rieh tngen shi por, da kaba shna bad la dep ïathuh ruh ha ki bor Sorkar.
U samla Lumlang Kharsyiemlieh President HYC West Khasi Hills District, u la ong ka seng ka wan ban ai mynsiem lem ïa ka Ïing, ha kaba kim dei ban duh jingkyrmen namar u Blei u tip kham bha.
U la ong ruh, “Ka ktien u Blei Shithi Jakob ka ong, phin ñiew ïa ka jingkmen suda haba phi hap ha ki jingtynjuh ba bun jait, ban ïaishah ïa ki namar u Blei un ai nong ïa u ba ïaishah”.
“Kumta hap ïaishah ïa ki jingeh kaba ngi mad, namar ha kane ka jingjia ngi duh tang ïa ki jingdon jingem hynrei ïa ki mynsiem ngi lait, kaba pynpaw ba u Blei u donlang. Ngin ïai kynmaw ïa phi ha ka jingkitbok bad jingduwai”, u la pynkut.
Ka seng ka ai khublei ruh ïa ka Shnong kaba la lah ban ïarap kloi kaba la long ka nuksa ïa kiwei ki shnong. La aiti ïa ki tin bad khaw jingïarap sha trai ha kane ka sngi.
