Ka shongkha shongman ka dei ka tynrai bad ka thymmei jong ka longïing longsem bad dei nangne ba la seng nongrim ïa ka longïing longsem, ka kur ka jait bad ka imlang sahlang. Ka jingsdang khie rarong jong ki Seng kur ha kine ki khyndiat snem mynta lehse ka lah ban wanrah ïa ka jingkylla khamtam ha kaba peit lem ïa ki longïing longsem jong la ki jong ku kur ki jait ban pynthikna ba ka shongkha shongman kan long kaba skhem bad kaba beit bad ryntih. Ka jingbymdon ïa ka seng kur kaba khlaiñ ha kine ki snem kiba la leit noh ka la buh jingeh shibun ïa ka imlang sahlang bad ïa ka jaidbynriew hi namar ba ki longïing Khasi jong ngi ki long kiba synjor bad ki bymdon ka jingkyrshan ban peit lem ïa kita kiba tlot. Kane ka la wanrah ïa ka shongkha shongman kaba syier ha kaba ki la mih shibun ki khun ki kti kiba khlem ki kmie kpa kiba lah ban pynsan pynrangbah ïa ki, kaba ki ong da ka ktien nongwei ka Broken Family.
Baroh ngi sakhi bad ka jingbun jong ki khun bym don ki kpa ka wanrah ïa ka longiing kaba tlot bad kaba synjor, ha kaba ki khun kim lah satia ban ïoh ïa hok bad ki jingdonkam jong ki, naduh ka pule puthi, ka bam ka dih bad kiba bun kiwei pat ki jingdonkam. Ka jingbymdon ïa ka longïing ne ki seng kur kiba khlain bad don jingkitkhlieh ka pynlong lyngkar bad laitlan bha ïa kiba bun ki samla la ki kynthei ne shynrang. Khamtam lei ki kynthei bapli ki bun kiba shu ïapoi kha bad ki khyllah jait namar jong ka jingban ka jingeh na ki jingduk jingkyrduh. Yn nai ïa ong eh ïa kito kiba la biang la bit la nang la stad bad don ïa ki kyrdan kiba biang namar ba kata ka jingpoi kha bad ki khyllah jait ka dei hi ka jingjied ne ka shyieng krung jong ki. Hynrei kiba bun kiwei kiba duk ba toi, ka dei ka jingbym banse namar jong ka jingshah ïehbeiñ ha la u para jait ne da kumwei pat.
Khnang ba kum ka jaidbynriew yn lah ban ïoh ïa ka longïing longsem kaba skhem ka shongkha shongman, ka long shisha kaba donkam ïa ki rangbah ne ki nongïalam kur ban ïa shimkhia lem ban ïamynsiem bad ban sneng ban kraw ïa la ki kur, ne ki para ki pyrsa ba kin long kiba adkar bad kiar na ki kam kiba lah ban ïalam sha ka jingbym sngewthuh ne ka jingjot jong ka longïing. Ka long ruh kaba donkam ban buddien ne peitngor ym eh tang ïa ki para ki pyrsa kiba dang samla, hynrei wat kito kiba la ïaid shaphrang ïa ka longïing longsem ruh ban pynthikna ba ki don ha ka jingïashongsuk shongsaiñ bad kiar na kano kano ka jingïapaid ïapra khiewja. Baroh shi katta la pynsngew ba kane lehse kan dei ka kamram jong ki nongshakri Balang ne ki riew tymmen tymsan; hynrei ngi ïohi ba bun kim shlan ban shim khia than ïa kum kine ki kam bad ong beit ba ka dei ka kam shimet jong kum kita ki longïing.
Ka jingskhem jong ki longïing longsem ka long shisha ka nuksa kaba bha na ka bynta ki longdien bad ka long ruh kaba itynnad bad ishngaiñ kum ka imlang sahlang. Haba phalang sha kane ka phang katto katne ki riew shemphang kiba don ka jingsngewkhia ïa kum kine ki jingeh ki pynpaw ka jingbynniaw ba ym baroh ki riew rangbah jong ka kur ruh khamtam lei kiba dei na ka liang jong ki kynthei ki don bun ki bym da don eh ïa kata ka jingsngew bah khlieh ban maitphang ne leh ei ei ban long kita ki nongprat lynti haba don kano kano ka jingïawit ne jingbym ïasngewthuh jingmut. Ha ki katto katne ki jingiamir jingmut la shem ba wat ki nongialam Balang ruh ki salia ban rung jylliew eh ha ka jingjia kiba kum kine, hynrei kaei kaba ki lah ban leh ka long ban pynlong ïa ka jingduwai
Hynrei ka long kaba sngewtynnad ban ïoh ba lyngba jong kane ka juk stad digital mynta, ngilah ban ïoh ki lad jingïarap ban pynsngewthuh bad ai mynsiem lem ïa kito kiba ngat ha kum kine ki jingeh lyngba ki jinghikai ne counselling jong ki. Ki riewngeit khristan ki sngewthuh bha bad ka jjingpyrshang ban pynsniewdur ïa ka shongkha shongman ka dei beit ka kam jong u soitan uba dei u nongpynjot pynpra uba la sdang ïa kane ka kam naduh ka kper Eden hi. Ha ka jingïaid lynti jong ki briew kiba la ngeit ha ka nongrim ki Khristan la shemba kawei na ka daw bah jong ka jingjot jingpra jong ki longïing ka dei na ka daw jong ka jingbym ïapyndemlang jong ki kmie ki kpa ha ka ktien ka jong U Blei kaba long ka nongrim jong ka jingim. Kane ka jia na ka daw ba la ailad ïa ka jingsngew briew kaba u soitan u wan ban ber bih ha ka jingim. (Salm 11:3).