Shillong, K’ Lyngkot 04: Ka khubor ba la ïoh na ki pulit la ïathuh ba u Chaman Barma da ka ktien u la pyntip ba ha ka janmied jong ka 1 tarik u Kyllalyngkot, uwei u Manoj Sharma ba la 31 snem ka rta, la shem ba u la thiah khlem tip briew hapoh ka ïew kaba don ha Nongmensong, Shillong bad la suba jur ba utei u briew u la shah shoh da ki runar bym lah ban ithuh. Kham hadien ïa utei u briew la pynkitnoh sha Civil Hospital Shillong.
Ha kawei pat ka jingjia ki pulit ki la ïathuh ba ha ka 1 tarik mynta u bnai ha ka por kumba 10.30 baje mynmiet ki runar bym lah ban ithuh ki la shoh ïa uwei u briew uba la ithuh kyrteng u Deva Kharkongor ba la 27 snem ka rta ha ïew Jhalupara, Shillong. Halor kane ka jingjia utei u lanot u la mynsaw bad la pynkitnoh sha Civil Hospital Shillong ha kaba nangne pat la phah rah noh sha NEIGRIHMS. Shuh shuh ki pulit ki la ïathuh ba u Tengham G Momin u la phah ka jingujor ba ha ka 29 tarik u Nohprah, 2024, ki runar bym lah ban ithuh ki la prong hapoh ka quarter jong u kaba ha MLA Hostel (Staff quarters), Police Bazar, Shillong bad ki la pyrshang ban tuh na kane ka quarter.
