Nongstoiñ, K’Lyngkot 4: Hadien shi snem kynthih, ka shnong Umkap ha ka jingïalam u Bah Jeremiïa Dkhar kum u Sordar shnong, mynta ka sngi ka la shna biang ïa ka jingkieng ba la shah rong da ka Wah Ryndi myn ha u snem ba la dep.
Ki paidbah Nongshong shnong ka Umkap West Khasi Hills ryngkat ka ka shnong ba marshilliang ka Rongchong na East Garo Hills, ki la ïoh ban shna lang ïa ka jingkieng kum ka dak ka jingïarap lem ïa ki paidbah nongshong shnong Umkap.
U Sordar ka shnong Umkap u Bah Jeremiïa Dkhar haba kren sha ki lad pathai khubor mynta ka sngi, u la pynpaw ka jingsngewnguh ïa ki paidbah nongshong shnong bad ki paralok Garo, kiba la wan ban ïarap lem ha ka ban shna pynbha ban pynlait ïaid kali ban kam sha shilliang ka Wah Ryndi.
“Ngi la ïoh ruh ban pynbha ïa ka jingkieng ïaid kjat kaba lah ban ïaid tang ki briew bad ka bike”, u la ong bad bynrap, “Tang ar sngi ngi ki nongshong shnong Umkap ngi la pynlut por ban shna biang ïa ka jingkieng ba la shah rong ha ka Umsaw ka Wah Ryndi myn ha u snem ba la dep”.
