Jowai, Lber 15: Ka Hynñiewtrep National Youth Movement (HNYM) Saphai Unit mynta ka sngi hapoh ka jingïalam u President ka West Jaiñtia u samla Pynhun Shulet ha ryngkat ka jingïadon lang u General Secretary ka Saphai Unit u samla Melki Dhar bad u Vice President Saphai Unit u samla Shemphang Dhar kila leit ïa kynduh ïa u Assistant Executive Engineer Shangpung Distribution Sub-Division ban dawa ban pyndep noh ïa ki Electric Poles kiba la sdang trei naduh u snem 2019 ha shwa ban wan ka khlam Covid-19.
La ïathuh ba kane ka jingsahteng ban pyntrei dep ïa kitei ki post light ban sam bordong kala pynlyngngoh pat ïaka seng ba haduh mynta ïa kine ki poles la ieh noh khlem da pyndep ïaki ha ki ba bun ki kyntoit jong ka shnong Saphai West Jaiñtia Hills District.
Na ka liang ka seng ka la dawa mardor na u Assistant Executive Engineer ban phah pyndep noh ïa kine ki poles khnang ba ki paitbah nongshong shnong kin ïoh ban ring light noh sha ki ïing jong ki bad ha ka juh ka por ruh na ka liang ka seng ka la ai por ïa u Assistant Excutive Engineer ban phah pyntrei biang hapoh ka shi taïew lada kim leh ka seng hi kam banse kan ïaid noh daka wei ka lynti.
Ka seng ha ka jingkren bad u AEE ula kular ban leh ïa kaba donkam bad ban phah noh ïa ki contractor ban pyndep noh ïa kitei ki poles ba dang sahteng. Shuh shuh ka seng kala kren shai ba kan nym shongthait kan ïai buddien kat bym pat pyntrei biang ïakine ki Electric poles.
