Nongpoh, Lber 15: Ka jingwan hap kynsan u phria ryngkat u lapbah hynnin ka miet jong ka sngi Balang ka la pynher syrngiew ïa kiba bun ki nongrep ha Ri Bhoi, namar bun ki nongrep ki la thung ïa ki jhur ki jhep ha ki pynthor kba kaba lah ban pynduhnong pynban ïa ki nongrep da ka jingwan hap u phria.
Ha ka miet jong ka sngi Balang kata ha ka por 11 baje ei ei mynmiet la sakhi ba u phria ryngkat u lapbah u la wan hap kynsan ha kaba la pynher syrngiew ïa kiba bun ki nongrep kiba shaniah da ka rep ka riang ba bun ki jingthung ki la sdang heh sdang san ha ki pynthor kba.
Kumba long ha Ri Bhoi, kiba bun ki nongrep ha kane ka por ki rep ïa ki jhur ha ki pynthor kba ba kynthup kum u sohsaw, phresbin, sohmynken, phan bad kiwei kiwei kiwei ki jingrep, ha kaba ha kane ka por ki la sdang ban khie san bad la don ruh ki nongrep kiba la jan ban ioh kheit bad kane ka jingwan hap kyrsan u phria ka la pynduh mynsiem bha ïa ki nongrep.
Kumba la iohi bad lap, u phria uba la hap u la don ka jingheh kat u Marble ïalehkai ki khynnah ha kaba ka jinghap ka la jur bha khamtam ha ka thaiñ Nongpoh ha Ri Bhoi, ha kaba ka surokbah National Highway-6 ka la dap da u phria bad la lieh shaid da u phria.
Haba ba wad jingtip halor kane ka jinghap phria ha Ri Bhoi na u Deputy Commissioner ka Ri Bhoi District, u Arpit Upadhayaya kum u khliehduh ka District u la pyntip kumba long haduh mynta kim pat ioh kano kano ka jingujor na ki nongrep halor ka jingshah ktah na u phria bad ym pat lah ban ioh jingtip ruh la ki nongrep ki la shah ktah ne em na ka jingwan hap une u phria.
Halor kane ka jinghap phria, wat la ki bor district kim pat ioh kano kano ka jingujor na ki nongrep bad kumba la sakhi pat na kane ka jinghap phria lah ban don ki nongrep kiba la shah ktah bad shah pynjulor ki mar rep, hynrei kim pat lah pat ban ai jingtip sha ki bor ba dei peit.
