Donkam ban pynshlur ïa ki khynnah skul da ki kam ïalehkai ban lait na ki jingmlien ba sniew: DSEO Ri Bhoi

Nongpoh, Lber 14: Ban plielad bad ban ai ïa ka rynsan na ka bynta ki khynnah skul ban pynpaw ïa la ki sap ha ka kam ïalehkai sport bapher bapher, nalor ka pule ka puthi kaba ki pulynlut por haki saw kynroh jong ki kamra klas, na ka liang ki bor pynïaid skul ka St. Mary’s Secondary School, Nongkhrah mynta ka sngi ki la plie pyrda noh ïa ka Inter House Annual Sports Week 2023 ha madan ïalehkai ka skul ha Nongkhrah.
Ïa katei ka Annual Sports Week la wan ban plie pyrda bad ban ai mynsiem ruh da ka Kong Paidolyne L Nonglait District School Education Officer, ka Ri Bhoi District kum ka kongsan ha ka jingdonlang ka Sister Melita Syiem Head Mistress ka St. Mary’s Secondary School, ki kmie ki kpa, ki khynnah skul lem bad ki nonghikai jong kane ka skul.
Ha ka sngi plie pyrda ïa kane ka Annual Sport Meet, la sdang shwa da ka jingïaid ïa ka March Pass ba la shimbynta da ki khynnah skul jong ka Red House, Blue House, Yellow House bad Green House, la pynbud pat da ka jingthang ïa ka sharak kum ka dak ban bud thik ïa ki kyndon ïalehkai sport ryngkat ka jingbam smai da ki khynnah skul bad pynphuh phieng ruh da ki jingrwai, jingshad bad mass drill bala shim bynta da ki khynnah skul.
Haba kren kum ka kongsan ka Kong Paidolyne L Nonglait kala ai ka jingïaroh ïa ki bor pynïaid skul jong ka St. Alfred SS kiba la shimkhia ban pynlong ïa kum katei ka lympung ïalehkai man la u snem khnang ban plielad ïa kito ki khynnah skul kiba don shisha ïa ka sap ïalehkai ba kin ioh ban pynpaw paidbah ïa kata ka sap bad ruh ban kiew ha kane ka kam ïalehkai sport, kumba katei ka skul ka dei ruh ka ba ju pynmih ïaki nongïalehkai ba tbit bala leit ban shim bynta wat sha ka District Level bad State Level.
Kala ong ruh ba ka sport ka hikai shibun ïangi ban heh ban San haka rukom ka ba koit ba khiah, ban pynproh ïaka jabieng bad khamtam ka hikai ban don ruh ka mynsiem kaba khlaiñ ban don ïaka akor ka burom ryngkat ka jingkyntu ruh ïaki khynnah skul ba ki dei ban kiar naki jingmlien bad ki jingdih ba sniew kum u drok, ka kyiad bad kiwei kiwei lada ki kwah ban poi shaka thong haka jingim jong ki.
“Ngi donkam ban pynshlur ïaki khynnah skul da ki jingïalehkai sports ba kin koit kin khiah bad kin lait naki jingmlien bad ki jingdih ba sniew kumba bun naki khun samla ki ngop noh haki jingdih buaid shiteng por khlem da lah shuh ban pyndep ïaki jingpule, bad ka sports ka dei ruh shibynta jong ka pule puthi ban pynkhlaiñ ïaka pyrkhat ka pyrdaiñ jong ki khynnah skul” la bynrap ka kong Paidolyne.
Lyngba kane ka sport meet ki khynnah skul kin ioh ban ïa shimbynta ha ki jingïakop kum ka 100mt, 200mt bad 400mt race, shot-put, long jump, high jump bad kiwei kiwei ki jinglehkai.