Shillong, Rymphang 29 : Ka Khasi Hills Autonomous District Council (KHADC) ha ka jingïalam khmat u Bah Pynshngaiñ N. Syiem uba dei u Deputy Chief Executive Member ka Council, hynne ka sngi Palei ka 29 tarik Rymphang 2024, ka la leit ban jurip ïa ka jingpynkhreh ban pynlong ïa ka Monolith Festival-2024 ha Mawphlang, ka ban sdang naduh ka 7, 8 bad 9 tarik Lber 2024.
Ha kane ka sngi la ïadon ryngkatlang ruh u Bah Titostarwell Chyne nongïalam ka Liang Pyrshah, ki MDC, ki dkhot ka Executive Committee, ki Myntri bad kiwei kiwei de.
U Bah Pynshngaiñ haba kren sha ki nongthoh khubor u la ong ba ka jingpynkhreh mynta ka la ïaid shad shaid bad ka long kaba jop namar na ka 100 percent la dep kumba 95 pcent bad ym slem shuh yn sa pyndep noh baroh khnang ba ka jingpynlong ïa ka Monolith Festival kan long kaba ïaid beit ïaid ryntih.
U la ïathuh ba katei ka tamasa ka long ban pyni nam ïa ki jingshad tynrai, ka rwai ka siaw jong u Khasi, ka jingpyninam ïa ki soh ki pai, ki doh thad tyrkhong, ki tiar ba shna u Khasi, ki jait jingbam bapher bapher bad u dohsnam ba paw bha na Laitlyngkot yn pyni bad die ha kitei ki lai sngi lynter bad kiwei kiwei de ki jingpyninam.
