Leit jurip biang u Lamphang ïa ka jingtei ka Ïingdorbar ba thymmai ha Mawdiangdiang

Shillong, Lber 24: U Lamphang ka Ïingdorbar thaw aiñ ka jylla u Thomas A Sangma ha ka sngi Nyngkong u la pynlong ïa ka jingbishar kam ha kaba ïadei bad ka jingtei ïa ka ïing dorbar kaba thymmai ha Mawdiangdiang.
Ïa kane ka jingïalang la pynlong ruh hapdeng ka jingleit jurip jong u ha kaba la shim bynta lang da u Symbud Lamphang u Timothy D Shira, u Symbud Myntri Rangbah ba khmih ïa ka tnat Parliamentary Affairs u Bah Prestone Tynsong, ryngkat bad u Commissioner & Secretary u Dr. Andrew Simons, u Additional Secretary Malthus Sangma, u Bah Cyril V. Darlong Diengdoh, Parliamentary Affairs bad ki ophisar na ka Meghalaya Assembly Secretariat.
Ha kane ka sngi la donlang ki nongmihkhmat na ki tnat bapher bapher kiba kynthup na ka tnat Public Works Department (PWD), Parliamentary Affairs Department, Design Associates, bad kiwei ki ophisar na ka Assembly.
Ha kane ka sngi ka la don ruh ka jingïakren ha kaba ïadei bad ki kam kiba dang ïaid bad kumjuh ruh ki jingïakren ba ki jingeh ba la mad haba pyntrei ïa kane ka projek.
U Lamphang u la pynpaw ïa ka jingsngewhun ha kaba ïadei bad ka jingmih na kane ka jingïalang, bad u la banjur halor ka jingdonkam ban don ka jingïatreilang hapdeng ki riewshem phang bad ki paidbah ban pynthikna ïa ka jingpyndep ïa kane ka jingtei ha ka por kaba biang bad kumba la buh.