Shillong, Lber 24: Ka Ïingkashari Gauhati High Court ha ka sngi Nyngkong, ka la ai ïa ka jamin ba shipor ïa u Chancellor ka University of Science & Technology Meghalaya (USTM) Mahbubul Hoque halor ka Dhekiajuli PS case ba kynnoh bam pisa ban pynleh thok ha ka eksamin CBSE.
Ïa kane ka mukotduma la mudui hapoh ka kyndon 318 (4)/316 (5) / 336 (3) jong ka Bharatiya Nyaya Sanhita (BNS) bad kyndon 11(1) jong ka Public Examination (Prevention of Unfair Means) Act, 2024.
Ka Ïingkashari Single Judge Mitali Thakuria ka la ai ïa ka jamin ba shipor halor ka jingsiew ïa ka surety ba T. 50,000 ha ryngat bad kawei pat ka surety ha kajuh ka dor, kaba la pynhun ïa u Chief Judicial Magistrate, Dhekiajuli.
Ka Ïingkashari ka la buh pat ïa ka kyndon ba u Mahbubul u dei ban ai ka jingïatreilang ba pura bad ki kynhun tohkit bad ban leit mih sha u Investigating Officer haba u donkam. Nalor kane, ka Ïingkashari ka la bthah ïa u Mahbubul ba um dei ban byrngem lane byrngem ban pynbiej ïa kino kino ki briew kiba tip ïa ka jingshisha halor kane ka jingjia.
Haba ai jamin, ka ïingkashari ka shimkhia ba u nongmudui ula pynksan bha ïa la ka mukotduma ban ïoh jamin hynrei kum ka sienjam ban ïada, ka Ïingkashari ka la hukum ban shong bishar biang ïa ka case diary sha ka 9 tarik Ïaïong ha shuwa ban shim ïa ka rai ba khatduh.
