Shillong, Lber 24: Ka A.C.H.I.K Krima Council ha ka sngi Nyngkong ka la khang khyrdep ïa ki katto katne ki dukan bad kumjuh ruh ki kharkhana ha nongbah Tura, kiba khlem bud ryntih ïa ki jingbthah jong ka tnad ka koit ka khiah bad treikam khlem ki licence kiba biang.
Ki dukan kiba la shah khang khyrdep mynta ka sngi ka 24 tarik u Lber ki don haduh 146 tylli kiba don ha supermarket, ïa kaba la kynnoh ba ki la buh ïa ki marbam ha paiñkhana bad kumjuh ruh ïa kawei ka dukan bad ka kharkhana kaba don ha Nakham Bazar bad ha Gariamat la khang namar ka jingbym don licence kaba biang jong ka Food Safety and Standards Authority of India (FSSAI).
Ka Council ka la pynpaw ba ki don ki trai dukan ki ïai bteng ban plie beit ïa ki dukan jong ki wat hadien ba la bthah ba ki dei ban khang tad haduh ba kin da ïoh ïa ki kot ki sla kiba biang kum ka licence.
Kane ka kynhun kan sa ïa kynduh ïa u Deputy Commissioner (DC) bad ban aiti ruh ïa ki shabi ba ki la khang ïa ki dukan bad ban kyntu ruh ïa ki bor pynïaid district ba kin leh eiei halor kane.
