Leit jngoh u Myntri Khynnah ia ka SWGH, iakren bad ki ophisar bad ki briew ba ioh jingmyntoi na ki skhim

Ampati, Kyllalyngkot 27: Katkum ka kam jong ka tnat Development of the North Eastern Region (DoNER), u Dr. Bhagwat Kishanrao Karad, Myntri Khynnah ka tnat ka ïoh ka Kot u la leit jngoh mynta ka sngi ïa ka Ampati, ka nongbah jong ka South West Garo Hills district ha Meghalaya ban peit ïa ka jingpyntreikam ïa ki skhim bapher bapher jong ka Sorkar.
ïa u Dr. Karad la synran da ka MP jong ka 2-Tura konstituensi, ka Agatha K Sangma, u MLA ka Rangsakona u Subir M. Marak, Deputy Commissioner, R.P. Marak, Superintendent of Police, Vikash Kumar ha ki jingïalang ba la pynlong ha lai tylli ki jaka ha kane ka jingwan kaba nyngkong jong u Myntri sha Ampati.
Ha Ampati Circuit House conference hall, la ai jingtip ïa u Myntri shaphang ka jingjop, ki jingseisoh bad ki jingeh ha ka jingpyntreikam ïa ki skhim Sorkar Pdeng lyngba ka power point presentation da ka ADC Dr. Rezina Ch Marak ha kaba la ïashim bynta ruh da ki ophisar na ki tnat bapher bapher.
Ha ka jingpeit ïa ki skhim ba ïalam da u Myntri Rangbah Duh, Narendra Modi bad ki sienjam jong ka Sorkar Jylla, u la ong ba u la hun ïa ka jingpyntreikam ïa ki skhim bapher bapher ha ka distrik bad u la ban jur halor ka jingïatreilang ban wanrah ïa ka roi ka par ha ka thaiñ shatei lammihngi. U Dr. Karad u la kren shaphang ki lad ban kyntiew ïa ka jingplie lad ïa baroh ha ki kam pisa, khamtam ha ki jaka rilum da kaba plie shuh shuh ki branch jong ki bank. U la ong ba ki jingïakren bad u Myntri Rangbah, Conrad Sangma ki la pyni ba ki don ki briew kiba trei na ka bynta ki bank bad ba kin sa don ki sienjam ban plie shuh shuh ki branch jong ki bank ban ai jingshakri ha ka thaiñ.
U Myntri u la ban jur halor ka jingdonkam ban kyntiew ïa ki jingshakri ha ki kam ka koit ka khiah da kaba plie lad shuh shuh ïa ka jingïoh ïa ki dawai ba shna hapoh ka ri bad ka jingkyntiew ïa ka jingsumar shuwa ban kha khun ha ryngkat ka jingkha khun ha ki jaka sumar. U la pynshlur ïa ka jingkyntiew kyrteng jong ki longkmie ba dang pun khun hapoh ka Pradhan Mantri Matru Vandana Yojana kaba ai jingmyntoi haba ki leit kha khunlung ha ki jaka ai jingsumar.
U Dr. Karad u la ban jur halor ka jingdonkam ban pynsaphriang ïa ki skhim ba ai jingkyrshan da ka Sorkar kum ka Pradhan Mantri Suraksha Bima Yojana kaba ai ka insurance ha ka dor kaba jem. U la ïaroh ïa ka jingïaid shaphrang jong ka Jal Jeevan Mission ha ka district bad u la kyntu ban ai jingtip shuh shuh bad ka jingpyntreikam kham bha ïa ka Pradhan Mantri Gramin Aawas Yojana.
U Myntri u la ïaroh ïa ki sienjam kiba ïadei bad ka pule puthi lyngba ki skul Eklavya Model Residential bad u la ong ba un sa peit ïa ki lad ki lynti ban plie shuh shuh kine ki skul ban pynbiang ïa ka pule puthi kaba bha ïa ki riewlum ha ki jaka ba jynjar ban poi.
Kum shi bynta jong ka Viksit Bharat Sankalp Yatra campaign, u Myntri u la ïakren bad ki briew kiba ïoh jingmyntoi ban ai jingtip bad pynthikna ka jingpyntreikam pura ïa ki skhim Sorkar ha kylleng ka ri. Kane ka campaign ka thmu ban pynpoi ïa ki kam sha kito ki bym pat ïoh ïa kine khamtam sha kito kiba dei ban ïoh ïa ki skhim bapher bapher hynrei ki bym pat ïoh ïa ki.
U Myntri u la ïakynduh markhmat bad katto katne ngut ki nongïoh jingmyntoi bad u la twad jingmut na ki shaphang ki jingmyntoi ba ki ïoh na ki skhim bad ruh ki jingeh ba ki ïakynduh ban ïoh ïa kine ki jingmyntoi. Ha ka jingpynkut ïa kane ka jingwan jngoh jong u, u Dr. Bhagwat Kishanrao Karad u la kren shaphang ka kamram jong baroh ban pynurlong ïa ka Viksit Bharat shuwa u 2047, kumba la thmu da u Myntri Rangbah Duh, Narendra Modi. U la ban jur ha ka jingpynïoh bynta ïa baroh ha ki kam pisa, ka jingai jingtip bad ka jingbteng ki jingpyrshang ban wanrah ïa ka roi ka par kaba pura ha ka thaiñ shatei lammihngi.
Ha kane ka jingïakren, ka MP Agatha Sangma bad MLA, Subir Marak ki la ai jingsngewnguh ïa Dr. Karad uba la pyllait por ban wan jngoh ïa ka thaiñ bad ban sngap ïa ki jingeh jong ki briew bad ki katto katne ki jingeh ha ka jingpyntreikam ïa ki skhim bad ki la kular ruh ba kin leh ïa kaba donkam ban pynbeit ïa kine ki jingeh bad ïatrei lang bad ka Sorkar Pdeng bad ka Sorkar Jylla.
Hadien kane, u Myntri u la leit jngoh ïa ka Ampati Civil Hospital bad u la ïakren bad ki nongai jingsumar shaphang ki jingdonkam ban kyntiew ïa ki lad ai jingsumar ha kane ka hospital. Ha kane ka sngi, u Dr. Karad u la ïakren ruh bad ki doktor bad ki nongtrei ha kane ka jaka bad u la ai jingsngewnguh ïa ki na ka bynta ka jingtrei shitom jong ki. U la ban jur halor ka jingdonkam ban pyndap ïa ki post ba thylli ha kane ka hospital ban pynthikna ka jingai jingsumar kaba bha. U la pdiang ïa ka jingdonkam ha ki kam puid nongpang ha ka thaiñ bad u la pynshlur ïa ki nongai jingsumar ba kin sdang mardor ia ki kam puid haba donkam ïa ki. U la kren shuh shaphang ki jingmyntoi kiba wan sha ki briew haba don ki kam ai jingsumar kiba khlaiñ ha ka thaiñ.