Shillong, K’lyngkot, 27: Ka Ministry of Home Affairs jong ka Sorkar Pdeng, hashwa ba ka ri baroh kawei kan rakhe ïa ka Republic Day, ka la pyllait ïa ki kyrteng jong ki riew pawkhmat ha ka ri ki ban ïoh pdiang ïa ka Khusnam Padma Award mynta u snem.
Ka long kaei kaei kaba sngewtynnad bad kaba sngewsarong ïa ka jylla Meghalaya ha kaba ka Kong Silbi Passah ka la shah jied ban ïoh pdiang ïa ka khusnam Padma Shri mynta u snem 2024.
Ka Kong Silbi Passah ka dei kaba shong basah ha Riatsamthiah, Shillong bad ka dei kaba la pawnam bha ha ka jylla ha kaba ïadei bad ka jingpynneh pynsah bad ban pyninam ïa ka rukom tem bad rukom shad tynrai.
Ka Kong Silbi kan pynkhreh mynta ban leit ban shimti ïa kane khusnam na ka kti jong ka President jong ka ri India ha ka jingïalang ka ban sa long ha Rashtrapati Bhawan ha u Lber ne Ïaiong mynta u snem.
Ka Kong Silbi Passah kan long ka nongshong shnong kaba ar hapoh ka Shnong Riatsamthiah ban shah jied na ka bynta ban ïoh pdiang ïa kane ka khusnam bad shwa kane ka Kong Silverine Swer ka la long ka kynthei banyngkong eh hapoh kane ka shnong ban ïoh pdiang ïa ka khusnam Padma Shri.
