Leit jngoh u Gajendra Singh Shekhawat ïa ki jaka jngohkai ha South West Khasi Hills

Mawkyrwat, ‘Nailur, 03: U Myntri ba dei peit ïa ka kolshor bad ka kam jngohkai pyrthei jong ka Sorkar India, u Gajendra Singh Shekhawat mynta ka sngi ka 3 tarik ‘Nailur, 2024 u la wan hiar jurip ïa ki jaka jngohkai kiba don South West Khasi Hills District ha ryngkat ka jingdonlang u bah Renikton Lyngdoh Tongkhar, MLA ka Mawkyrwat Constituency lem bad ki ophisar sorkar ba kynthup ïa u bah B. Mawlong, IAS, Deputy Commissioner, South West Khasi Hills District.
Lah ban kdew ba ki jaka ba u Myntri ba dei peit ïa ka kolshor bad ka kam jngohkai pyrthei u la leit jngoh ki long ka Hot Spring ha Jakrem, ka Synrang Mawrin ha shnong Mawten, ki Mawkyrduk, Mawbynna (Tynrong) ha shnong Mawlangwir bad ka Mawranglang Viewpoint ha shnong Mawranglang, South West Khasi Hills District.
Haba kren ha ka jingïalang ba la pynlong ha kawei na ki jaka jngohkai ha Synrang Mawrin ha Mawten, u Gajendra Singh Shekhawat u la pynpaw ïa ka jingkmen ba ka thaiñ shatei lammihngi bad ka Jylla Meghalaya ka don ïa ki jaka jngohkai kiba itynnad khamtam eh haba u la ïoh ban wan ïuhkjat ha ka thaiñ Mawkyrwat kaba don ïa ki jaka ba pyngngad. Kumta ka bynta ba kongsan ba ka kam jngohkai pyrthei kan leh ha ka jingïaid lynti jong ka India ban long ka jaitbynriew kaba kiew ha u snem 2047. U la ong, “Baroh ngi tip ba ka jaidbynriew ba ieid jong ngi hapoh ka jingïalam jong u Myntri Rangbahduh ka Ri India, u Narendra Modi jong ngi ka la saphriang mynta ban long ka ri ka ban kiew sha u snem 2047 da kaba ithuh ïa ka ri India kum kawei na ki ri kaba kiew stet tam ha ka pyrthei namar ka jinglah ban pynïaid ha kaba ïa dei bad ka kam jngohkai pyrthei bad kane la sakhi ba ka la nang kiew man la ka sngi”, u la ong. Ym tang kata, ula kubur ba ka kam jngohkai kaba heh tam, ka shong ha ki jylla ka thaiñ shatei lammihngi bad khamtam eh ha ka jylla Meghalaya bad baroh ka jylla Northeastern namar ka long kaba la kyrkhu da ki jingpher jong ka riti dustur bad ka jingitynnad jong ka mariang sawdon sawkun, u la bynrap.
U Myntri ka sorkar India u la kdew ruh ïa ka jingïakynduh jong u bad ki Myntri ka kam jngohkai pyrthei na ka thaiñ shatei lammihngi, ki jylla shatei lammihngi, bad ki Union Territories hynnin ka sngi ha Shillong kaba la long ban sngewthuh bad ban kyntiew shuh shuh ïa ki kam jngohkai pyrthei jong ki jylla ka thaiñ shatei lammihngi. Ula ong ruh ba ki jylla ki la ai ki jingkren halor ki buit treikam jong ki ha ka kam jngohkai pyrthei, ryngkat ka jingïasam ïa ki jingïathuhkhana jong ka jingjop bad ki jingeh ha kaba pyntyllun ïa ki kam.
U Gajendra Singh Shekhawat ula ïaroh ruh ïa ka jingpyrshang jong ka sorkar jylla namar u la ong, “Ki sorkar jylla ki la ïasam ruh ïa ki jingthmu jong ki ryngkat ka jingkyrmen kiba bun ban wanrah ki jingkylla ha ka jingïalang hynnin ka sngi bad nga thikna ba ki thong ba hakhmat jong ki kin long ka lad kaba khraw na ka bynta u ne ka nongjngohkai pyrthei kiba wan jngoh ïa ki jylla, da kaba kin wan peit ïa ki kolshor ba riewspah, ki jaka kiba itynnad bad ka jinglong ka suiñbneng kaba itynnad”.
Shuh shuh u la ong, “Ka jingroi jong ka kam jngohkai pyrthei ka lah ban wanrah ïa ka jingkylla kaba khraw ha ka jingim jong ki nongshong shnong, ka spah ha ka ïoh ka kot jong ki ruh kan kiew, ka jinglong jingman jong ki kan kylla sha kaba bha”. Namarkata, u ai ka jingkitbok kitrwiang ba ha ka por ban wan ki kam jngohkai pyrthei, kin sa long ki lad jingmyntoi ïa kiba bun khamtam ban kyntiew ïa ka ïoh ka kot jong ki jylla ba shatei lam mihngi.”
Namarkata, lyngba ka jingwan ïuhkjat jong u mynta ka sngi ïa ki katto katne ki jaka jngohkai u la ong ba ki long shisha ki jaka kiba itynnad bad u da khot da wer de ïa kiwei ba kin da wan sakhi hi ïa ki jingitynnad jong ka mei mariang ha kine ki thaiñ.
Ym tang kata, ha ka jingleit jngoh ïa ka Synrang Mawrin ka la don ruh ka jingïalang ba lyngkot ryngkat da kaba pynbud ïa ki jingrwai bad jingtem tynrai kata na ka Sur ki Nongkyndong, ka Cultural Dance na ka Ri – Maram Folk Academy, Mawlangwir bad ka Shad Suk Mynsiem.
Nangta, ka la don ruh ka jingaiti ïa ki dorkhas sha u Myntri ba dei peit ïa ka kolshor bad ka kam jngohkai pyrthei jong ka Sorkar India, u Gajendra Singh Shekhawat na ka shnong Mawten, na ka shnong Mawlangwir bad na ka Sngap Syiem College, Mawkyrwat.
Hadien ka jingleit ban ïuhkjat ha ki jaka jngohkai pyrthei, u Gajendra Singh Shekhawat u la don ruh ha ka jingïalang bishar bniah ban bishar ïa ki skhim kiba ïadei bad ka kam jngohkai pyrthei ha ka South West Khasi Hills District. Ha kane ka jingïalang, u Myntri Sorkar u la kylli bniah halor ka jingwan ki nongwan jngohkai pyrthei, ka jingpyntreikam ïa ki ïing sahmiet ne homestay, bad u la bishar ïa ki skhim bapher bapher, kynthup ïa ka Mahatma Gandhi National Rural Employment Guarantee Act (MGNREGA), ka Pradhan Mantri Adi Adarsh Gram Yojana (PMAAGY), ka Prime Minister’s Employment Generation Programme (PMEGP), ka Community-Led Tourism Infrastructure Scheme bad kiwei kiwei kiba thmu ban kyntiew ïa ka kam jngohkai pyrthei.
Ha kane ka jingïalang bishar bniah, ka la kynthup ruh ïa ki jingïakren halor ki kam bad ki jingïalang ban kyntiew ïa ka kam jngohkai pyrthei ha ka South West Khasi Hills District, kumjuh ruh ïa ka jingdonkam ban pynbha ïa ki jaka sah ha ki ïing bad ban pynthikna ïa ki jingdonkam ba kongsan, kum ki jaka bam ha ki jaka jngohkai pyrthei.
Kiwei de kiba la donlang ki long u bah M. Synrem, Joint Secretary jong ka tnat Tourism, u bah L.T. Tariang, Additional Deputy Commissioner, South West Khasi Hills District, u bah I. Lawryniang, Block Development Officer, Mawkyrwat C&RD Block, u bah L. Kharponriah, District Tourism Officer, South West Khasi Hills District lem bad kiwei.